Parlamentario Endy Croes ta preparando un carta oficial den nomber di Fraccion di MEP cual lo sali e siman aki pa Minister Glenbert Croes cu un peticion pa por alarga FASE te cu December. Manera ta conosi Covid 19 a dal Aruba mas duro cu tur otro islanan den region como cu Aruba su economia ta depende 80% di turismo. Consecuentemente hopi ta esnan cu a keda sin trabou desde Maart cu corona virus a hasi su entrada na Aruba.
/// Minister Glenbert Croes y Minister Xiomara Maduro a actua mesora:
Desde cu Corona viris a hasi su entrada 13 di maart di e aña aki Gobierno di Aruba hunto cu Crisis Team a tuma medidanan nesesario pa flatten the curve savalguardia salud di pueblo na promer lugar. Como cu casi 37000 mama y tata di famia a keda sin trabou Gobierno mesora a activa un programa bou di e nomber di FASE pa asina brinda sosten pa e famia cu a keda sin trabou. Den luna di Juni Fraccion di MEP den un reunion na Parlamento a hasi peticion na Minister Glenbert Croes pa alarga FASE cu 3 luna mas cual mesora Minister Glenbert Croes a bay di acuerdo den cooperacion cu Minister di Finansas Xiomara Maduro a percura pa aloka fondonan nesesario pa Juli-Augustus y September. Esaki tabata nesesario pa juda e pueblo den un forma continuo.
/// Parlamentario Endy Croes cu peticion oficial den nomber di su Fraccion:
Parlamentario Endy Croes a tuma nota cu tin un cantidad enorme di hende ta dependiendo di e ayudo aki ainda y primordialmente awor cu e di dos “wave” a dal Aruba esaki a trese cune cu gobierno mester keda creativo pa cu ayudo na pueblo. Economia no a recupera ainda lo suficiente. Manera ta conosi tanto e fondonan di FASE y tambe e sosten MKB ( Middel en Kein Bedrijf) ta bini di presupuesto di Aruba mes entre otro di e solaridad cu empleadonan publico (12.6%) y Ministers y Parlamentarionan (25%) a entrega den colaboracion cu e solaridad di companianan estatal pues no di Hulanda. Esaki ta crea e espacio nesesario pa acomoda fondo pa extende FASE y MKB. Parlamentario Endy Croes ta spera cu e peticion aki wordo poni riba agenda di Ministerraad pronto e siman entrante pa asina tin un aclareacion pa pueblo primordialmente esanan cu ta cobra FASE y comerciantenan cu ta ricibi sosten di MKB cual por garantisa e trankilidad den lunanan di October-November y December.