Durante un ceremonia special, cu hopi nificacion pa nos, a inaugura e patio nobo di Headlines Group, E patio, situa den Zoutmanstraat, ta dedica na baluartenan di prensa, Tom Pietersz, Johnny “Django” Simoons y Victor “Toko” Winklaar.
Boso a sirbi como nos guia, hopi aña pasa. Cada un di e baluartenan aki a nifica hopi pa e fundeshi cu cada un di e pilarnan di e compania, Tanto den corant, na radio y na television.
E idea tras di e patio ta pa e sirbi como un espacio adicional pa haci entrevistanan, pa recrea y pa inspira durante nos trabou diario.
E scogencia pa e tres baluartenan aki ta debi na nan trayectoria largo den prensa na Aruba. Nan a dedica henter nan bida na informa .Y nan no a spaar nan experiencia, sino a pas’e pa e siguiente generacion tambe, pa mas cu un persona.
Nos ta kere den rindi homenahe na bida. Mustra un persona cuanto nos ta admir’e y aprecie. E scogencia pa dedica nos patio na e baluartenan aki tabata facil, pasobra ta trata aki di e pilarnan importante di prensa local .Tur tres baluarte a hiba palabra y a gradici pa e reconocimento. No ta algo cu nan a spera riba dje.
TOKO WINKLAAR
Victor “Toko” Winklaar a cuminsa traha den prensa na aña 1969, cu e corant “Nobo” di Corsou. El a forma parti di e redaccion na Aruba. Despues el a funda, hunto cu Jossy Mansur, e revista “Brindis”. Mas di 40 aña pasa el a para na cuna di nacemento di e matutino “Diario”. Despues el a traha como e redactor na Aruba di e matutino Extra di Corsou. Toko Winklaar a funda e prome corant na color na Aruba, esta “Bon Dia Aruba”. Y 14 aña pasa el a funda e matutino “Awe Mainta” y tabata e prome corant cu a bay digital tambe. Separa di corant, Winklaar ta traha na radio pa hopi aña caba, cuminsando for di Canal 90 te na Radio Galactica, unda e ta duna noticia te awe ainda. E tabatin programa na television tambe y hasta a fungi como director di Tele Aruba durante dos aña largo.
JOHNNY “DJANGO” SIMOONS
Johnny “Django” Simoons di 75 aña di edad ta naci na Corsou y ta biba na Aruba desde 54 aña pasa. Precisamente dia cu el a casa, el a bin biba na Aruba. Awendia e tin 50 aña caba trahando den prensa na Aruba. El a cuminsa na La Prensa Aruba, a sigui despues cu NOBO Aruba y awendia e tin mas di 40 aña trahando na Diario. Ainda e ta activo trahando diariamente pa Diario.
THOMAS “TOM” PIETERSZ
Thomas “Tom” Pietersz di 75 aña di edad, a cuminsa traha den prensa na Arubaanse Courant na aña 1967. Despues el a bira e director/redactor di La Prensa Aruba pa hopi aña. Na aña 1996 el a funda Aruba Television (ATV) y awendia ta gozando di un pensioen bon mereci. Desde 1969 tambe tabata milita como politico den partido PPA, liderando e hala hubenil Hubentud Patriotico Arubano (HPA).