nos ta celebra e esfuersonan realisa door di hende muhe rond di mundo den crea un futuro mas igual y recuperacion di e pandemia di COVID-19, na mes un momento resalta e deficiencianan cu ainda ta existi.
Declaracion di Bejing
Na 1995 e ‘Declaracion di Beijing y Plataforma di Accion’ pa logra igualdad di genero a wordo adopta door di 189 miembro di estado durante un reunion na China. Awe 26 aña despues e documento aki ta sigui fungi como guia pa e lucha contra limitacionnan y obstaculonan pa empoderamento di hende muhe rond di mundo.
Un di e delaracion realisa ta cu ta convenci cu empoderamento di hende muhe y nan participacion completo riba e base di igualdad den tur esfera di sociedad incluyendo participacion den proceso di toma di decision y acceso na poder ta fundamental pa logra igualdad, desaroyo y paz. Alcansa e meta di participacion igual di hende muhe y hende homber den toma di decision, lo provee un balansa cu ta refleha e composicion di e sociedad y ta necesario pa fortalese democracia y promove su funcion adecua.
Liderazgo y participacion di hende muhe den politica rond mundo
Na e momentnan aki solamente 14 pais a logra 50% of mas di hende muhe minister den gabinete y 4 pais so a logra 50% of mas di hende muhe den parlamento. Den latino America, Caribe, Europa y Norte America hende muhe tin mas di 30% di asiento den parlamento. Den Norte di Africa, Este di Asia y Oceania hende muhe tin menos di 17% di asiento den parlamento. E representacion di hende muhe mas abou ta den Islanan di Pacifico di 6 % y 3 pais cu no tin representacion di hende muhe mes.
Tin varios pais rond Mundo cu mester a aplica Temporary Special Measures un tipo di fast-track “Elecotral Qoutas” pa aumenta representacion di hende muhe den politica por ehempel: reserva di asiento den parlamento; leynan pa garantisa un proporcion minimo di hende muhe riba lista politico; promesa di partido politico entre otro.
Mundialmente e persistencia di discriminacion, prehuicio di genero, amenasa di violencia, acoso y intimidacion ta contribui na baho nivel di participacion politico di hende muhe. Accionnan cu por wordo realisa pa contra aresta esaki ta pa atende cu e prehuicionan di genero y apoya e participacion politico di hende muhe atraves di iniciativanan pa crea capacitacion/scholing pa sostene participacion di hende muhe den politica, promove “networking” pa hende muhe politico y brinda training pa partido politiconan entre otro.
Aruba
Aunke hende muhe na Aruba a haya e derecho di voto na 1948 y ta representa mas di e mitad di voto electoral ainda hende muhe aki na Aruba no a logra un representacion igual den politica.
Si nos tira un bista riba e ultimo eleccion a participa 140 candidato politico di cual 41 tabata hende muhe (grafico 1). Durante e eleccion aki tabata tin 70,749 persona cu derecho di voto, 33,941 tabata hende homber y 36,808 tabata hende muhe (grafico 2). 59,430 persona a haci uso di nan derecho di voto, di cual 58,679 tabata voto valido di e total aki 14,338 voto tabata pa candidatonan femenino (grafico 3).
Actualmente na Aruba 2 di 7 ministernan (28%) y 7 di 21 parlamentarionan (33%) ta femenino, den grafico 4 y 5 por mira e representacion di nos hende muhe y hende homber den gabinetenan y parlamento desde Status Aparte.
Participacion igual y liderazgo di hende muhe den politica y bida publico ta esencial pa alcansa Metanan di Desaroyo Sostenibel pa 2030. E ta den man di cada hende homber y hende muhe pa alcansa un futuro igual den tur sentido.
