Diaranson atardi, na Cede di MEP a tuma luga e lansamento di candidato nobo pa districto di Noord. Señor Jaime Winterdal, un Nortero di curason ta casa y tata di 2 yiu. Un ingeniero studia na Costa Rica. Durante su estudio, Jaime tabata den bestuur di Fundacion Cas Aruba unda nan tabata yuda e studiantenan nobo y stagiaires cu tabata yega Costa Rica pa haci nan pasantia.
“Mi a keda cu e gana di sigui yuda y p’esey semper mi a bisa cu mi estudio di ingenieria mi mester por uze pa yuda mas hopi hende cu ta posibel y esey mi a haci ora cu mi a bolbe bek Aruba despues di a gradua. Awor mi ta dilanti di un otro reto grandi den mi bida unda lo mi kier sirbi mi pueblo di Noord y e pueblo di Aruba completo den e area di infrastructura cu ta mi area di experticio”, Jaime a expresa durante su lansamento como candidato riba lista di MEP.
Riba e pregunta pakico el a subi riba lista di Partido MEP, Jaime a contesta: “Pasobra mi a tuma nota cu MEP berdad ta un partido cu ta pone hende central y cu ta traha incansablemente pa e bienestar di nos país y MEP tin balornan cu ta klop hopi cu mi manera di pensa y mi manera di wak bida”.
Señor Jaime Winterdal a expresa cu semper el a admira un Lider cu di berdad ta e capitan cu a nabega den lama hopi bruto sin perde e stre’i-nort.
“Nos Minister Presidente Evelyn Wever-Croes a demostra cu no solamente e por lidera un partido, sino un País completo. Minister Presidente hunto cu su team a mustrami cu nan ta capas di hopi mas”, Jaime a duna di conoce.
Lider di MEP, Evelyn Wever-Croes den nomber di Partido MEP ta yama Jaime bon bini riba e lista victorioso y prestigioso pa Eleccion 2021
