Riba 4 di mei tradicionalmente ta considera dos minuut di silencio den cuadro di e ceremonia conmemorativo ‘Dodenherdenking’ den henter Reino. Esaki en conmemoracion di tur esnan cu den nomber di Reino Hulandes a perde nan bida of a wordo asesina durante e di Dos Guera Mundial. Tambe ta conmemora esnan cu desde e tempo ey a perde nan bida den conflictonan di guera of den e misionnan pa mantene paz.
Gobernador di Aruba, Su Excelencia Alfonso Boekhoudt, na comienso di e anochi aki a asisti na e ceremonia conmemorativo na Monument Schutterij en Vrijwilligerskorps Aruba. Mescos cu aña pasa e ceremonia a tuma luga di manera adapta en conexion cu e medidanan vigente contra corona. Presente e aña aki tabata Coby Henriques, Vice-Presidente di CAMARADA cu a ricibi Gobernador na yegada, Prome Minister S.E. Evelyn Wever-Croes, Presidente di Parlamento Juan E. Thijsen, Representante Suplente di Hulanda na Oranjestad, David Abrahams y un unidad di Cuerpo di Marina Real den funcion como warda arma.
