Gezaghèber ta risibí e di dos edishon di Capita Selecta Caribisch Fiscaal Recht

Gezaghèber Edison Rijna a risibí e di dos edishon di e buki Capita Selecta Caribisch Fiscaal Recht (Kapítulonan selektá di Derecho Fiskal Karibense) for di man di e fiskalista Jaap Roks. Jaap Roks ta spesialisá den derecho di impuesto boneriano. Capita Selecta Caribisch Fiscaal Recht na un manera úniko i komprendibel ta laga studiantenan i otro interesadonan sera konosí ku e área di derecho akí.

Capita Selecta Caribisch Fiscaal Recht ta brinda un perspektiva úniko pa tur hende ku ke sera konosí ku e tereno hurídiko akí. E buki ta adekuá komo manual den tantu siensia komo práktika. Tambe e material di lès ta obligatorio den diferente estudio.

‘Nos ta purba entusiasmá e futuro studiantenan ku a lanta na Boneiru pa legislashon fiskal lokal’, segun  Jaap Roks. Despues di un estudio di derecho fiskal òf ekonomia fiskal tin sufisiente oportunidat pa nan hasi karera na Boneiru, tantu den sektor públiko komo privá.

E speransa ta pa duna un aporte ku e buki akí na regreso di e grupo di studiante akí pa Boneiru. Pa medio di e buki akí tin e posibilidat awor pa durante nan estudio kaba optené konosementu di legislashon lokal.