Minister di Husticia mr. drs. Arthur Dowers a haci un bishita na Fundacion Guia Mi, caminda directora Anneke Nicolaas-Lucas a ricibi e mandatario. Durante e bishita a hiba un combersacion tocante e trabao di e fundacion, e retonan cu nan ta enfrenta y e importancia di cooperacion den proteccion di menor.
Fundacion Guia Mi tin un rol importante den proteccion y guia di muchanan na Aruba. E fundacion ta brinda supervision y acompañamento na menornan y famianan den situacionnan cu ta rekeri atencion y proteccion adicional, semper cu interes y bienestar di e mucha como punto central.
Durante e combersacion, Minister Dowers a haya oportunidad pa conoce mas di cerca e trabao cu Fundacion Guia Mi ta ehecuta diariamente y intercambia pensamento cu directora Nicolaas-Lucas tocante e retonan cu e fundacion ta enfrenta den practica.
Pa Minister Dowers, un bon cooperacion entre e diferente organisacionnan cu tin un responsabilidad den proteccion di menor ta esencial. Cada instancia tin su propio rol, pero e meta comun mester semper ta pa proteha e mucha y crea e condicionnan pa nan por crece den un ambiente sigur.
