Durante Accion di Bario diahuebs mainta, Prome Minister Mike Eman a bishita Centro di Bario y Deporte Dakota, caminda el a haya un rondleiding di e facilidad y a conoce di cerca e diferente actividadnan y proyectonan cu e centro ta desaroya pa comunidad.
Presidente di Centro di Bario y Deporte Dakota, Carlmichael Bikker, a califica e bishita como importante pa e desaroyo futuro di e centro. Segun Bikker, Premier Eman ya algun luna pasa a expresa su intencion di bishita e facilidad pa conoce personalmente e trabou cu ta tuma luga eynan.
Durante e recorido, Premier a topa entre otro cu e grupo di adulto mayor Flor di Aloe y a haya un splicacion amplio tocante e proyectonan actual y ideanan cu directiva tin pa futuro.
Un di e aspiracionnan ta pa sigui mehora e espacio rond di centro y crea un ambiente mas berde y agradabel, cu mata y flor y un luga caminda principalmente adultonan mayor di bario por sinta, socialisa y pasa un rato den trankilidad.
Bikker a enfatisa cu funcion di un centro di bario ta bay mucho mas leu cu solamente ofrece un espacio fisico.
“Centro di Bario ta corason di e bario,” el a expresa, indicando cu e centro mester keda activo pa diferente generacion den area di deporte, educacion, cultura y arte.
Como ehempel, Centro di Bario y Deporte Dakota tin computer y acceso na internet disponibel pa muchanan cu no tin e facilidadnan aki na cas, pa nan por bishita e centro y traha riba nan proyectonan di scol.
Bikker a expresa satisfaccion cu e bishita y a destaca importancia di cooperacion entre comunidad, Gobierno y instancia priva pa centro di barionan por sigui cumpli cu nan funcion.
“Tur granito di arena ta yuda pa haci Centro di Bario y Deporte Dakota cada biaha miho,” Bikker a conclui.
