E declaracionnan reciente di Sindicato di Trahadornan den Cuido di Salud (ABV) encuanto e situacion financiero y operacional na Horacio Oduber Hospital (HOH) ta extremadamente preocupante pa Fraccion di MEP. Señalnan cu e hospital ta den un crisis alarmante debi na aumento drastico di gastonan y caida di entradanan no por pasa sin atencion y accion directo di Gobierno. E echo cu di parti di Gobierno mes nos no ta ricibiendo ningun tipo di informacion, ta pone e situacion aki den un luz aun mas preocupante.
Fraccion di MEP ta exigi contesta di Minister di Salud
E continuidad y e calidad di cuido di salud pa nos pueblo mester ta garantisa na tur momento y mirando e situacion financiero presenta pa ABV ta surgi hopi pregunta y preocupacion. Alabes e informacion cu hasta Gobernador a keda informa di e situacion delicado aki y anos di Parlamento mes no a keda informa di nada ta hopi preocupante. Pa e motibo aki, Miembro di Parlamento Drs. Shailiny Tromp-Lee, pa medio di Presidente di Parlamento, a manda un carta oficial cu un serie di 19 pregunta dirigi na Minister di Salud Publico, sra. Mervin Wyatt-Ras.
“Nos no por permiti cu pashentnan, trahadornan den cuido y pueblo en general ta keda den incertidumbre. Ora nos ta scucha cu gasto di remedi y material a subi cu casi 30%, y cu e expansion di e edificio di 18 mil pa 35 mil meter cuadra a trece un aumento drastico den gasto di awa, coriente y mantencion, y cu pashentnan mester busca servicio esencial manera MRI na otro caminda, nos mester di claridad completo,” Tromp-Lee a expresa.
E preguntanan manda na e Minister ta entre otro:
*Informacion y verificacion: Ki dia Minister a keda informa oficialmente di e situacion di crisis aki, door di ken, y con ta atendiendo cu e situacion.
*Finansa y fluho di entrada: Confirmacion si efectivamente a perde e di tres fluho di entrada, e suma exacto cu esaki ta representa, y con ta cubriendo e deficit aki actualmente.
*Impacto riba pashent: E motibonan tras di e situacion cu e aparato di MRI, e medidanan di urgencia pa proteha e pashent, y e situacion actual di e listanan di espera pa operacion y tratamentonan specialisa.
*AZV y Presupuesto: E propuesta di Organo Ehecutivo AZV, si e “lump sum” actual ta refleha e costonan real di un hospital expandi y modernisa, y ki paso ta wordo tuma pa evita un colapso financiero.
*Recurso Humano: E garantia cu e crisis aki no lo bay afecta pago di salario, beneficionan secundario di trabou, ni mantencion di e personal medico y di enfermeria.
Tromp-Lee ta enfatisa cu cuido di salud ta un di e pilarnan mas fundamental di nos sociedad. “Nos pueblo tin derecho riba un sistema di salud stabiel y di miho calidad. Mi ta keda en espera di e contestanan di e Minister pa por haya transparencia completo y pa busca solucionnan structural pa HOH.”