Parlamentario sr. Frenciss Lourens di frakshon MFK a dirigí preguntanan na Minister di Tráfiko, Transporte i Planifikashon Urbano, Charles Cooper, tokante konstrukshon, demolishon i intervenshon ku ta visibel den baranka na Playa Jeremí.
Segun sr. Lourens, Playa Jeremí i su área kostero ta parti importante di e patrimonio natural i paisahe di Kòrsou. P’esei, ora tin konstrukshon òf otro intervenshon direktamente na kosta, mester tin klaridat ku tur kos ta sosodé segun lei i ku ta tene kuenta ku seguridat, naturalesa, medio ambiente i bista di nos kosta.
E echo ku un tereno ta privá no ta nifiká ku por hasi kualke intervenshon sin tene kuenta ku e reglanan. Nos kosta ta parti di e imágen i patrimonio di Kòrsou, i gobièrnu tin un responsabilidat pa vigilá ku interes general ta wòrdu protehá.
Den su preguntanan a base di artíkulo 96 di Reglamentu di Òrdu di Parlamento, sr. Lourens ta pidi minister pa duna klaridat si tin pèrmit pa e trabounan na Playa Jeremí, kua instansia a otorg’é i si loke a wòrdu hasi ta kuadra ku loke a wòrdu aprobá. E parlamentario ke sa tambe si promé ku e intervenshon a investigá e posibel konsekuensianan pa stabilidat di e baranka, seguridat, naturalesa i medio ambiente.
Lourens ta pidi gobièrnu tambe pa splika te na unda e por intervení, ounke ta trata di tereno privá, si resultá ku un konstrukshon òf demolishon ta kontra di pèrmit, ta pone seguridat na peliger òf ta kousa daño na naturalesa.
Un otro punto importante ta protekshon di karakter natural di nos kosta. Segun sr. Lourens, lugánan manera Playa Jeremí no tin solamente balor pa hende ku ta biba na Kòrsou, sino tambe balor rekreativo i turístiko. P’esei e ta pidi klaridat tokante e reglanan ku ta konta pa konstrukshon i intervenshon den baranka direktamente na kosta.
Finalmente, e parlamentario ta pidi minister pa laga e instansianan kompetente hasi un inspekshon na e sitio den un término kòrtiku. Si resultá ku no a aktua segun pèrmit òf lei, sr. Lourens ke sa si gobièrnu ta dispuesto pa tuma medida pa koregí e situashon i, kaminda legalmente ta posibel, laga restourá e baranka òf área kostero.
“Desaroyo ta importante, pero e mester bai sam sam ku rèspèt pa lei, seguridat i protekshon di nos naturalesa. Loke nos hasi ku nos kosta awe, ta loke nos ta laga atras pa e siguiente generashon”, asina sr. Lourens ta finalisá.