40 aña di experiencia brindando calidad halto di trabou na Aruba den e ramo di media
Prome Minister Evelyn Wever-Croes den nomber di Gobierno di Aruba ta felicita sr. Leo Vrolijk cu e bunita cifra di 40 aña di experiencia brindando calidad halto di trabou na Aruba den e ramo di media. Señor Leo a cuminsa su carera na TeleAruba y a pasa gran parti di su carera eynan.
Señor Leo Vrolijk no ta un persona desconoci na Aruba. e ta un persona cu 40 aña di experiencia brindando calidad halto di trabou na Aruba den e ramo di media. Durante un encuentro ameno organisa pa Minister Xiomara Maduro, Prome Minister Evelyn Wever-Croes a felicita señor Vrolijk riba e fecha aki unda cu e ta cumpli 40 aña den media.
Prome Minister a duna di conoce cu el a siña conoce señor Leo despues cu el a caba di studia y cuminsa traha na Departamento di Impuesto, na unda cu ya caba señor Leo tabata haci trabou den prensa y duna informacion. E tempo ey, señor Leo tabata duna informacion pa Gobierno.
Locual cu semper a hala mi atencion ta e profesionalismo, su amor pa e trabou y mas ainda, su amor pa Aruba. Pa Leo, Aruba ta hopi importante y semper a percura pa hiba e mensahe positivo di Aruba padilanti.
Mi ta felicita Leo y alabes gradici Leo pa tur locual cu el a haci. Na caminda mi sa cu Leo a inspira hopi hende pa sigui den e trayectoria aki, no solamente su famia pero mas hende tambe. E momento aki merece pa gradici y reconoce Minister di Finansa Xiomara Maduro tambe, cu ta pone atencion special na ocasionnan/reconocementonan asina cual ta hopi importante.
Kisas un persona no ta traha 40 aña den prensa pa e haya un reconocemento despues di 40 aña, pero e ta hopi bunita si, cu ta duna e persona e atencion y reconocemento cu e merece di haya. Pabien Leo. Danki pa semper ta parti di brinda informacion corecto y eficas”, Prome Minister a expresa.