Dialuna Minister di Turismo y Salud Publico Sr. Dangui Oduber tabata den un conferencia di prensa caminda e trece hopi informacion importante pa comunidad. E mandatario a duna un actualisacion di henter e situacion di COVID-19 na Aruba. E mandatario a papia di e cantidadnan di caso cu tin, e cifranan di e hospitalisacion actual y e capasidad cu tin den cuido intensivo na nos hospital. Tambe e mandatario a elabora riba kiko mester bira e “exit strategy” di e pandemia manera cu e ta awor.
Exit strategy
Minister Oduber den su ultimo conferencia di prensa a papia di un plan cu tin pa por siña biba cu e virus di COVID-19. Dialuna mainta e mandatario a elabora riba e plan aki cu ta carga e nomber di “exit strategy”. E “exit strategy” aki ta pa bolbe bek na normalidad cu tur precaucion y risiconan calcula. Minister Oduber ta convenci cu Aruba tin diferente instrumento den su poder pa por manha e crisis y esaki ta haci cu pronto por cuminsa midi e crisis aki na un otro manera.
Minister Oduber a splica cu durante henter e crisis a purba crea e balansa entre salud y economia pero poniendo e salud semper na prome lugar y esaki no lo bay cambia pero awor lo bay evalua otro modelonan tambe. Por ehempel mester bay evalua modelonan economico, laboral, financiero y cultural. Na Hulanda tambe e Minister nobo di Salud Publico Sr. Kuipers a menciona cu mester bin cu otro manera pa enfrenta e crisis.
Exit Strategy plan ta ensera:
- Cuminsa habri e discusion di bai pa por declara e virus aki endemico
E virus a muteer hopi e ultimo variante ta menos fuerte y ta pesey nos tambe mester considera declara e pandemia endemico.
- Expande e capacidad di nos ICU na 16 cama y cu e personal necesario
Personal di “AMI Expeditionaly Healthcare” ta personal hopi costoso pa Aruba y tambe pa Hulanda. Pa es motibo riba nos propio forza nos kier percura pa expande nos capacidad di ICU. E testing a genera hopi entrada pa LabHOH y AZV, pa e motibo aki AZV a bai di acuerdo pa pone 2.4 miyon florin disponibel pa busca mas personal riba propio forza y expande nos capacidad na ICU.
- Elimina seguro obligatorio na airport y introduci un heffing cu lo ta specialmente pa genera entrada pa inverti bek den cuido.
- Lo bay cambia e maneho di testing na airport y tambe e maneho di testing pa localnan.
Pa e turista lo bay flexibilisa e maneho di ingreso caminda entrante 18 di januari lo bay cuminsa acepta anti gen testing cu ta mas economico y a cambia e PCR testing di 24 pa 48 ora prome cu e vuelo pa Aruba.
Pa e localnan lo bay cambia e manera di test manera e ta awor, esaki ta debi cu e manera actual ya no ta dunando e efectividad y e no ta sostenibel mas mirando cu e variante aki ta mucho mas contagioso. Ta bay introduci un maneho di test nobo cu ta e sentinel testing. Esaki ta nifica cu dokternan di cas ta bay haci invitacion selectivo na diferente personan pa bin haci test pa haya un indicacion con e virus ta plama den comunidad.
- Sigui focus riba booster y vacuna
E vacuna a duna resultado cu nos tawata buscando y pesey lo bay sigui recomenda esaki. Minister Oduber a recorda comunidad cu durante e peak den e di 4 ola tabata tin 116 persona interna den hospital y 82% di esnan interna NO tabata ta vacuna.
- Ta bay reenforza Departamento di Salud Publico.
- Lo bay elimina tur medida y habri Aruba por completo.
Minister Dangui Oduber a dirigi su mes na comunidad bisando cu Aruba ta pasando den su di 5 ola di COVID-19, e posibilidad ta cu nos por sigui haya diferente otro variante. Aruba mester simplemente siña biba cu e virus paso porta e no ta bay stop di existi.