Gobierno di Corsou a ricibi aprobacion di parti di Conseho di Minister di Reino (RMR) pa por desvia for di e normanan presupuestario di e aña aki. Desviacion di e normanan presupuestario ta nifica basicamente, cu entre otro Gobierno di Corsou por tin un presupuesto cu un deficit pa e aña presupuestario en cuestion.
E Ley di presupuesto di Corsou di aña 2022 manera aproba dor di Parlamento di Corsou a keda firma pa Gobernador di Corsou, sra. Lucille George-Wout. Cu e firma di Gobernador, e presupuesto pa aña 2022 oficialmente a keda acorda. Despues cu e presupuesto a keda acorda pa Gobernador, sr. Javier Silvania tambe a firma esaki como Minister di Finansa na nomber di Gobierno di Corsou y Prome Minister, sr. Gilmar Pisas, finalmente a firma pa autorisa publicacion di e lei. Oficialmente a publica e presupuesto pa aña 2022 dia 17 di febrüari ultimo y conforme articulo 16, insiso 2 y 3 di e Ley di contabilidad 2010, esaki a drenta na vigor cu forsa retroactivo te cu 1 di januari di e aña aki.