Secretario di Estado pa Relacionnan den Reino, Eric van der Burg, a duna claridad riba e proceso tras di e Ley di Reino riba supervision financiero (Rijkswet HOFA). Contrario na e percepcion cu no tin unanimidad, Van der Burg a confirma cu den e organo maximo di Reino, e Ministernan Plenipotenciario a hunga un papel determinante pa e ley por a sigui su curso.
Segun e declaracionnan recien di Van der Burg, e consenso necesario pa avansa cu e Rijkswet HOFA a keda alcansa formalmente den e Conseho di Ministernan di Reino (Rijksministerraad). E instancia aki, cu ta consisti di e ministernan di Hulanda hunto cu e Ministernan Plenipotenciario di Aruba, Curaçao y Sint Maarten, a vota unanimente na fabor di e propuesta, segun van der Burg
E balansa di voto y e peso di e Minister Plenipotenciario
Un punto clave den e declaracion di e mandatario Hulandes ta e definicion di “consenso” den e contexto aki. Van der Burg a splica cu, maske den e esfera politico local por tin hopi debate y oposicion, e posicion oficial di e paisnan den Reino ta wordo presenta pa nan respectivo Minister Plenipotenciario y den e caso aki Minister plenipotenciario Schwengle a permiti pa e ley sigui e caminda sin consenso di Parlamento di Aruba.
“Tur tres Minister Plenipotenciario di Aruba, Curaçao y Sint Maarten, hunto cu e ministernan Hulandes, a vota na fabor di e propuesta, sinembargo cada un di e islanan ta den diferente status” Van der Burg a enfatisa. Cu e voto positivo aki, e Gobierno di Aruba representa pa su Minister Plenipotenciario a duna e luz berde pa e ley wordo procesa, estableciendo asina e base legal pa e siguiente pasonan.
Obstaculo final: Parlamento di Aruba tin e ultimo palabra
A pesar cu e consensus a keda logra den e Conseho di Ministernan di Reino, e ley ainda no ta un echo completo. Van der Burg a splica e conexion legal stringente: e Rijkswet no por drenta na vigor si Aruba no aproba un Ordenansa Nacional (Landsverordening) den su mesun Parlamento.
“E Ley di Reino y e ordenansa nacional ta mara na otro. Sin e ordenansa, no tin Ley di Reino,” e Secretario di Estado a clarifica. Esaki ta nifica cu e debate awor ta traslada for di e mesun di Reino pa e sala di Parlamento di Aruba, caminda e coalicion di gobierno lo mester busca e mayoria necesario pa ratifica loke nan Minister Plenipotenciario a acorda na Den Haag.
Un impacto di miyones den interes
E urgencia tras di e aprobacion aki tin un fondo estrictamente financiero. Van der Burg a revela cifras preocupante: actualmente Aruba ta presta placa riba e mercado internacional cu un tasa di interes di casi 7% (6.9%).
Si e Rijkswet HOFA wordo implementa, Aruba lo por beneficia di e credito di Hulanda, locual lo baha e tasa di interes na mas of menos e mitar. Esaki lo nifica un sparmento structural di diesnannan di miyon di florin pa aña pa e presupuesto nacional di Aruba.
Awor, e bista ta keda riba e desaroyo den Parlamento di Aruba pa mira si e “si” cu a wordo duna na Hulanda pa e Minister Plenipotenciario lo haya e respaldo legislativo necesario pa bira realidad.
E enfoke aki ta mustra cu e Minister Plenipotenciario tabata e ficha clave pa “consenso” existi legalmente. Sabiendo kico ta e danjo y kico tur Aruba lo perde cu e ley aki.