Despues di a cumpli exactamente cuater siman cu e directiva nobo di sindicato SPA a drenta na mando, e prioridad maximo ta pa mantene e miembronan debidamente informa y update, sea via chat groups, email, of reunionnan general. Asina e presidente di e sindicato, Lito Lacle, a duna di conose recientemente.
Segun Lacle, e directiva kier demostra un transparencia total cu su miembronan, kendenan awor tin e poder pa bini cu mocionnan pa asina duna e directiva un mandato cla riba e pasonan cu mester tuma.
Peticionnan structural sin contesta for di februari
El a splica cu for di dia 1 di juni, e directiva a manda cuater carta pa Mando Policial. E cartanan aki ta trata topiconan di sumamente importancia pa e cuerpo, manera:
1. E bullet proof pa polis
2. E samwerkingsprotocol (protocol di colaboracion)
3. Restructuracion di e cuerpo
4. E stuacion di strandpolitie
Mando Policial a ricibi un plaso di dos siman pa contesta e cartanan aki. Maske a ricibi un contesta dia 13 di juni, Lacle a enfatisa cu e situacion rond di e bullet proof ta keda preocupante. Mando Policial a manda un contesta caba, indicando cu e proceso mester a cuminsa. Sinembargo, te cu awe 29 di juni, nada concreto no a wordo haci.
E directiva a asigna dos colega di SPA pa forma parti di e comision encarga cu e procedura di stipulá e bullet proof, pero te na e momentonan aki, e sindicato no a ricibi ningun invitacion oficial pa participa.
Pa loke ta e samwerkingsprotocol, Lacle a informa cu tabatin un reunion cu Mando Policial dia 16 di juni. Dia 17 di juni, e Chief of Staff di Mando Policial a ricibi e concepto di e protocol den su man.
Awor, hunto cu dos miembro di e directiva, ta repasando e documento aki. Lacle a destaca e importancia di involucra miembronan di directiva cu ta bini directamente for di e ‘werkvloer’ specificamente di e straddienst ,ya cu nan ta esunnan cu realmente sa kico ta pasa den practica diario, mientras cu otronan sa biba leu di e realidad ey.
Alerta coriente: Salud mental y siguridad riba caya
Pa cera, e lider sindical a bati alarma riba dos problema grandi cu e cuerpo ta enfrentando actualmente. Un di nan ta e salud mental di e coleganan. SPA ta insisti cu mester percura pa e siguridad di e oficialnan ora nan ta riba caya, y na mes momento, ta urgentemente necesario pa tin un protocol structural y completamente cla riba con pa brinda e asistencia adecuado na e trahadonan cu ta pasando den crisis of mester di apoyo psicologico.