Gobierno ta acerca ‘Stichting Overheidsaccountantsbureau’ (SOAB) pa haci un evaluacion di e trayecto cu a cana pa yega na e Emblema – concepto cu publico a scoge. Pa locual ta trata e parti legal di derechonan di autor ta acerca un experto pa duna conseho.
Esaki ta un palabracion concreto cu Minister Sithree van Heydoorn y Comision Emblema Nacional Corsou a haci pa trece claridad.
E minister a evalua y dialoga cu e miembronan di e comision riba diferente temanan relevante cu ta di importancia pa cu e concepto cu a keda scoge como esun ganado. Tambe a pone enfasis riba e echo cu e trayecto aki tabata uno caminda pueblo den e fase aki por a participa y a scochi esun ganado.
E tarea di e comision tabata pa crea regla y criterio pa tur persona por participa. Tambe e comision tabatin como tarea pa selecta un maximo di 10 finalista for di e 205 diseñonan cu e participantenan a entrega. Despues comunidad a haya oportunidad pa vota pa nan emblema faborito. Na final e comision a conseha Conseho di Minister pa scoge esun cu a haña mas voto di publico. E escoho aki cual a keda presenta na publico 10-10-22 lo tin cu bay sigui e trayecto tradicional pa wordo formalisa.
Pa claridad ta bon pa bisa cu e desicion pa inisia e trayecto aki a tuma luga na december 2020. Den un trayecto di solicitud publico cu a tuma luga na februari 2021 a scoge 5 ciudadano (tuma nota di e LB y MB adhunto), pa forma parti di e comision cu mester a canalisa e trayecto pa yega na un emblema. E mesun 5 ciudadanonan aki a keda forma parti di e comision te cu dia cu e concepto a keda presenta na publico
Despues di a reuni cu miembronan di e comision e minister a informa e señora cu a gana e premio. Asina e señora a keda informa cu hunto ta bay haci un evaluacion den cuadro di e proceso cu e comision a cana durante di e trayecto. E tarea principal pa un evaluacion, pa trece claridad y transparencia. Den esaki ta bay wak si tin violacion di cualkier criterio cu participantenan mester a tene nan mes na dje, si tabatin violacion di derecho di autor y si a privilegia un of mas participante den e trayecto aki.
Gobierno ta informa cu riba un termino corto por dispone di resultado di e evaluacion SOAB y lo publica esaki. Gobierno lo no ta duna mas declaracion tocante e trayecto di Emblema te na momento cu publica resultado di e evaluacion.