Dialuna poco prome cu 3’or di marduga, alarma a wordo bati pa un cas cu lo tabata na candela den Archimedesstraat. E holo fuerte di huma a lanta varios bisiña for di soño y ora nan a bay mira di unda e huma ta bin, nan a bin topa cu e cas inhabita den Archimedesstraat na candela. E cas aki ta algun tempo caba na benta.
Polis a yega prome na e sitio y a pidi pa presencia di brandweer. Hopi lihe un truck di brandweer a yega y a cuminsa combati e candela, mientras e tankwagen tabata na caminda. Un rato despues e tankwagen a yega y asina hopi lihe brandweer a logra domina y paga e candela.
E candela feroz a destrui e cas completamente di paden y tambe por a mira con huma y candela tabata sali for di e dak. E cas inhabita aki frecuentemente sa wordo bishita pa adictonan ambulante.
