Ta invita Pueblo pa ban apoya e Festivalnan di Dande Infantil, Hubenil y Adulto dia 28 y 29 di december
Fundacion Chico Harms a organisa un bunita ‘Show di Dande’ na Centro di Bario Brazil cu a conta cu participacion di varios grupo Tipico cu a deleita e publico presente cu e musica folklore di Dande cu ta forma parti di nos cultura di Fin di Aña. Minister Maduro di Cultura tabata presente pa asina por a gradici Fundacion Chico Harms y tur Tipico cu ta aporta pa tene nos cultura di Fin di Aña bibo.
Minister Maduro ta extende un invitacion na comunidad pa presencia y apoya nos hobennan na e ‘Festival di Dande Infantil y Hubenil’ cu ta tuma luga na Centro di Bario Tanki Lender diaranson 28 di december. E mandatario ta invita pueblo en general tambe pa acudi diahuebs 29 di december na Club Caiquetio pa apoya Aruba su ‘Festival di Dande Adulto’ na unda lo gradici sr. Harry Croes pa su 50 aniversario organisando e festival di Dande brindando Pueblo e oportunidad pa nos biba nos cultura di Fin di Aña.
