Den ultimo luna di aña Aruba Lions Club ta sigui juda den comunidad cu su projectonan entre otro cu e “Smile Mobile” cu a pasa na cas di cuido pa nos grandinan y hasi limpiesa di e dentadura nan of tambe drecha si ta necesario. Esaki sigur ta un bunita gesto pa prepara e grandinan tambe pa drenta e temporada di fin di aña cu un bunita sonrisa y sigur ta contribui na e calidad di salud.
Mescos tambe Aruba Lions Club su hobennan di Aruba LEO Club a hasi nan projecto cu cena pa e muchanan den necesidad y despues tambe a ricibi un pakete cu cuminda y un regalito di Pasco.
Ultimo projecto pa 2023 di Aruba Lions Club e biaha aki a concentra riba muchanan menos afortuna cu a hiba un pakete di cuminda y tambe un regalito pa por celebra nan Pasco feliz.
Un gran cantidad di muchanan rond riba nos isla a haya bishita di e miembronan di Aruba Lions Club cu a entrega esakinan personalmente na e muchanan y deseandonan tur cos bon y sperando cu e gesto aki nan por pasa un dushi temporada di fin di aña.
Pa mas cu 75 aña Aruba Lions Club ta contribui na su comunidad y ta sigui cu e tradicionnan pa sigui cu e trabou dificil aki pa buska e fondonan den comunidad pa sigui juda esnan den necesidad.
Aruba Lions Club cu esaki kier a gradici tur comerciante cu semper a sa di juda den e projectonan, su colaboradornan, tur den nos comunidad cu semper ta sostene e projectonan, pa nan aporte asina valioso pa por duna bek na comunidad.
Alavez kier a desea tur hende, pueblo en general pa por celebra e fin di aña den harmonia cu bisiña, famia y conocirnan y pa esnan pa cualkier motibo ta den tristeza of pa motibo di malesa no por celebra, ta desea nan tambe hopi forza y positivismo pa e 2024 por tin prosperidad, salud y felicidad.
