Dia 15 di februari, S.V. Racing Club Aruba (RCA) a celebra 90 aña di existencia. Minister Endy Croes a atende e brindis na Club di RCA na Solito. Na 1934, a funda e club bou di e nomber Aruba Beste Club y na 1937 a cambia e nomber pa Racing Club Aruba. E club tin un trayecto hopi largo, impresionante y exitoso den futbol di Aruba. RCA a conkista 34 titulo di campeon den Division di Honor di futbol di Aruba. Un total di 20 biaha RCA a titula subcampeon, pues e ekipo a hunga mas cu 50 biaha e gran final di futbol di Aruba den su 90 aña di existencia. RCA tin alrededor di 250 mucha activo den e club. Ademas di esaki, RCA tin alrededor di 20 cabayero cu ta forma parti di e team di Division di Honor. Tambe, RCA tin mas o menos 100 miembro. RCA ta activo den 18 division, entre otro, u5, u7, 3 team di u9, 3 team di u11, 3 team di u13, u15, u17, u20, Damas Youth y Open, Division di Honor y veterano. Mester remarca algun logro historico di RCA, entre otro, e prome campeon di Aruba Copa Antiyano, e prome campeon di Pais Aruba na 1986, e prome campeon Liprof, e prome campeon ABS na 2015 y e ekipo cu mas titulo di campeon den Division di Honor di futbol di Aruba.
Durante e ceremonia festivo aki, Minister Endy Croes a hiba palabra y a gradici tur ex presidente, directiva, coach, boluntario y patrocinado pa sostene ekipo di RCA. Tambe, Minister Endy Croes a felicita y gradici e mayornan cu ta duna nan yiu apoyo y sosten pa nan practica nan deporte faborito. Deporte ta e vehiculo cu ta trece hende hunto, crea amistad y ta forma un miho persona pa sociedad. Minister Endy Croes a enfatisa cu el ta sigui sostene deporte den su totalidad. Den nomber di Gobierno di Aruba, Minister Endy Croes a haci entrega di Reconocemento di Excelencia y a gradici RCA pa engradece e deporte di futbol na Aruba. E anochi festivo a culmina cu bautismo di uniform nobo di tur division di e prestigioso club.
Pa conclui, Minister Endy Croes ta felicita e ekipo di RCA y ta deseanan hopi exito!
