MAN-PIN a reuní ku abitantenan kaya Mikeas di e bario Noord Zapateer pa tende nan preokupashon riba e situashon di tráfiko den nan kaya. E reunion a tuma lugá riba petishon di e abitantenan mes.
Nan ta preokupá pa e kantidat di tráfiko di outo i vehíkulo pisá den nan kaya. Ta bin aserka ku e tráfiko ta pasa riba un velosidat haltu ku ta hasi e situashon difísil i peligroso pa nan, ora na kier sali nan kas.
MAN-PIN ta komprondé ku abitantenan riba inisiativa propio a aserka servisio di Obra Públiko (OW) pa asina por remediá e situashon. Tambe nan a reuní ku minister di VVRP, Carles Cooper (MFK) ku tambe a primintí di trese solushon.
Abitantenan a komprondé for di e reunionnan aki ku tin “bestelbon” firmá pa kontratista kuminsá hasi trabou pa asina obligá e tráfiko pa kore mas slo dor di pone “drempel”. Pero te ainda tur kos a keda na promesa so i no a hasi nada konkreto pa remediá e situashon.
Entretantu e abitantenan ta sinti ku ta manda nan di kashi pa muraya pasobra kada bes ku puntra OW ki dia e trabounan ta kuminsá, ta konta nan un otro historia. Mester trese solushon pa e abitantenan aki mirando ku e tráfiko di velosidat haltu ta trese peliger den un zona urbano (“bebouwde kom”) kaminda nan ta biba.
Pa e motibu aki MAN-PIN, na nòmber di e abitantenan di kaya Mikeas ta hasi un yamada na gobièrnu di MFK i PNP i partikularmente na minister di VVRP, Charles Cooper ku ta enkargá ku Obra Públiko, pa mas lihé posibel duna atenshon i solushoná e situashon aki. “Pasobra e abitantenan di kaya Miklas tambe ta siudadanonan di Kòrsou ku, meskos ku nan tin ku kumpli ku nan obligashonnan, tin e derecho di biba den un ambiente sigur.”