A percura pa fundeshi fuerte pa turismo cu cultura di nos Pais como motor
Diaranson atardi Ministernan Maduro y Croes a ricibi e pionero den turismo di Aruba, sr. Micheal Kuiperi pa asina den nomber di Minister President Evelyn Wever-Croes entrega na su persona un Reconocemento di Excelencia di Gobierno di Aruba.
Sr. Michael Kuiperi tabata e prome director di Oficina di Turismo di Aruba y a percura pa traha un fundeshi fuerte pa desaroya e industria di turismo na Aruba. Danki na su vision, curashi, creatividad y trabou duro, Aruba a yega riba e mapa internacional como destino turistico. Sr. Kuiperi a percura pa, entre otro, e prome vuelonan di Merca pa Aruba via Puerto Rico y di e manera eynan a sa di pone e fundeshi pa e diferente vuelonan directo cu a sigui di Merca pa Aruba.
Ta importante pa menciona cu sr. Micheal Kuiperi a traha incansablemente pa Aruba su cultura wordo conoci, nos musica rezona y nos artistanan local briya riba escenarionan internacional di turismo, pa di e manera aki haci e turista curioso pa bishita Aruba. Danki na e trabou pionero di conecta turismo y cultura di Aruba, awendia e turista cu ta bishita Aruba no ta bin solamente pa e ‘Sun, Sea, or Sand,’ pero nan ta mas interesa pa e ‘Soul’ di Aruba cu ta e cultura di nos Pais.
Pa Minister Maduro di Cultura e tabata un honor y placer inmenso pa den nomber di Minister President Evelyn Wever-Croes por a dedica algun palabra di gratitud y brinda sr. Micheal Kuiperi e reconocemento special aki di Gobierno di Aruba den presencia di Minister Glenbert Croes y nieto di sr. Kuiperi, sr. Micheal Leo van Rommondt. “Nos ta hopi gradici na sr. Micheal Kuiperi pa su vision, trabou duro y specialmente pa e amor pa Aruba cu cual sr. Kuiperi a traha na pone e fundeshi fuerte pa Aruba su industria di turismo. Masha danki pa conecta y reconoce e importancia di nos cultura como motor tras di turismo di nos Pais,’ tabata palabranan expresa pa Minister Maduro na e bunita ocasion pa reconoce e pionero den turismo, sr. Micheal Kuiperi.
