Durante un conferencia di prensa Nigel Maduro un hoben activista a expresa su preocupacion pa loke ta sosode na Aruba, principalmente den e area di Medio Ambiente y bida Marino.
E ta un activista pa cinco aña caba.
Ta trata di Nigel Maduro, kende a bin ta manifesta su preocupacion pa e situacion reinante na Aruba. El a corda cu el a bay studia den exterior na 2016 y ora cu el a bolbe aña pasa el a topa cu un situacion cu e ta considera alarmante. Hopi rosamento di mondi, bashamento asfalta, menos bestia na Aruba cu antes. Un Aruba cambiando demasiado lihe, menos mata. Mondinan cu e tabata hunga den nan, no ta existi mas. E lamanan cu e tabata bay cu su famia, no ta manera antes. E lama ta sushi, of tin sludge.
Ta sinti hopi falta di prikichi den mundo. Den bida marino ta igual. Estudio a mustra cu 90 porciento di Aruba su naturalesa of bida marino ta bayendo perdi. E mes a bay snorkel na Arashi y Sasarawichi (na rancho). A mira coralnan malo, muriendo of morto. E sitio tabata shinishi, y e tabata un sitio ancestral, unda tabata sinta come calco of pisca. Ora cu el a snorkel, a topa solamente cu un calco.
Ta parce cu e cambio ta afecta herencia cultural. Medio Ambiente no ta haya atencion mas, na su pensamento.
Ta wak rond, sa kico ta pasando, naturalesa ta sufriendo hopi pero e lidernan no tin atencion pa esaki. Esey ta motibo cu for di september a cuminsa manda carta pa lidernan mustrando kico ta pasando. E no a haya ningun reaccion y a cuminsa post su materialnan riba rednan social.
Despues el a cuminsa cu su acto du graffiti y hopi hende a cuminsa papia riba e tema, principalmente e mensahe di “No more hotels”. Despues el a entrega su mes y a cumpli cu taakstraf.
Despues a organisa protesta riba 18 di maart y a interumpi e discurso di Prome Minister. Loke el a haya lamentabel ta cu riba e video a saca e protesta afo. Dia 27 di april a bolbe tene un manifestacion, kibrando e protocol, hunto cu un grupo di ciudadanonan preocupa. E lidernan a simplemente bira cara otro banda y no a scucha e grupo.
E ta haya straño cu a kita tur graffiti di no more hotels pero otronan si a laga. Pues ta e mensahe di No More Hotels, Maduro ta bisa, nan kier censura.
E siguiente evento ta un manifestacion estilo di beach parti durante cinco siman na diferente hotel y a finalisa esaki na Baby Beach. Ademas di mustra nan protesta, a organisa tayer y dunando informacion na esunnan interesa.
Loke Maduro ta sinti ta cu e lidernan local no ta interesa pa papia riba proteccion di nos medio ambiente y bida marino. E ta sinti cu no ta scucha e localnan.
Tambe el a referi na e encuesta realisa door di ATA riba e sentimento di e localnan riba turismo. E resultado ta mustra cu ta mas interesa den crecemento social cu turismo.
