Yuinan ta un herencia di Senjor,(Salmo 127:3) esey tur mayor mester sa, pasobra ta Dios ta forma yiu den barica di un mama.
Pasobra despues cu e tata deposita e simia, e no por haci nada mas, y tur cos ta keda den man di Dios.
Esey ta mustra e secreto di creacion cu Dios a deposita den un homber y un muher y asina pa medio di homber y muher mundo su poblacion aumenta.
KICO TA NIFICA BALORA BO YIU?
For di chiki, dune bon cuminda, mantene un bon higiena, y den tur cos wak pa e crece bon.
Asina e cuminsa bira grandi, guia e mucha den caminda di Senjor, coregi y disiplina bo yiu.
Tur clase di malcriansa ta trece decepcion, tanto pa abo como mayor y tambe pa e yiu.
No laga cos bay for di man pasobra ta depende di abo como mayor con e karakter di bo yiu lo ta.
Wak pa e mucha ta bon y decente bisti na tur momento, tanto mucha homber , como mucha muher.
Sinja bo yiu papia berdad tur momento, sinja bo yiu respeta su mes y tambe respeta otronan.
Sinja bo yiu cu un bon colonia no por tapa un mal karakter, pasobra arogancia ta pone cara di hende na berguensa.
Wak bo yiu su vocabulario, y asina bo tende algo cu no ta zona bon, coregi e mucha su forma di papia.
inmediatamente.
Yuda e mucha den escogencia di amistad, pasobra tempo ta malo y nos yuinan mester di guia, pasobra esun cu ta anda cu hende sabi lo ta sabi,pero esun cu ta anda cu hende bobo, lo sufri e consecuencia.
Haci tur locual ta posibel pa bo yiu ta un sigidor di Cristo Hesus y un bon cuidadano , integro y respetuoso.
Corda bon cu tur mayor mester respeta nan yiu, y asina ta un bon testimonio pa nan yiu.
KICO TA NIFICA BALORA BO MAYOR?
Honra bo tata y bo mama.( Efesionan 6:1-4).
Respeta bo mayornan, y no halsa bos cu bo mayornan.
Ora bo bira grandi y bo ta trahando, bo deber ta pa contribui den e canasta di cuminda y utilidad na cas, (Tur esaki ta educacion pa ora bo tin bo propio hogar).
Ta dificil pa un yiu ta traha tur dia y no ta duna nada na cas, pero ta biba den e cas, no ta contribui financieramente cu nada.
Pone tempo pa papia y sali cu bo mayornan, esey ta un aprecio cu ta yena curason di tur mayor.
No ansha bo mes pa hiba bo mayornan cas di anciano, manera nan ta un peso riba bo lomba, pero tuma tempo pa nan.
Si un mayor tin hopi yiu, tur mester traha tempo pa bishitanan y combersa cu nan.
Si mayornan ta malo of a opera por ehempel wowo, tur yiu mester bini hunto traha plan con ta bay cuida nan mayor pa e no perde su bista.
No saca bo mayornan for di cas, pa huur of bende e cas, pa asina abo yega na placa.
Awendia tin hopi mayor ta bisa cu nan tin yiu, pero ora yega e momento pa cuida, ningun no ta presenta, nan trabao, tin mas balor cu nan mayor.
No laga ningun hende drenta bo bida cu no kier aprecia bo mayornan, of ta stroba abo di zorg pa nan.
No lubida kico bo mayornan a haci pa bo tempo bo tabata chikito.
Yiu honra bo tata y bo mama, pa tur cos bay bo bon, y pa bo tin bida largo riba mundo.
