Tabatin reakshon positivo riba e Town Hall Meeting tokante entre otro e Plan di Mehorashon pa lèntfel Lagun, e enkuentro tabata karakterisá pa un ambiente habrí i konstruktivo. Meta di e reunion tabata pa informá komunidat tokante e status aktual i na mes momentu dialogá aktivamente tokante preokupashonnan i posibel solushonnan pa salubridat públiko i medio ambiente na i den bisindario di lèntfel. E reunion akí tabata e di promé den un seri di reunion ku lo organisá relashoná ku e tema maneho di sushi.
Durante e enkuentro ku a tuma lugá djabièrnè anochi 2 di mei 2025, a atmití abiertamente seriedat di situashon rònt lèntfel di Lagun. E problema di medio ambiente i riesgo potensial pa salú ta mustra kla ku esaki ta un kaso ku mester di atenshon urgente i un solushon konhunto.
Tabatin presentashon di Programa Duradero Maneho di Sushi (Programma Duurzaam Afval Beheer-DAB) i di GGD, kaminda kada un a splika na su turno mas tokante e medidanan pa mehorashon i investigashonnan di aspekto di medio ambiente i aspektonan di salú di e situashon. Bishitantenan a hasi pregunta krítiko, a kompartí nan preokupashonnan i a pensa aktivamente huntu ku esnan presente. A surgi diálogo balioso entre gobièrnu, profeshonal i abitantenan, loke ta kontribuí na un búskeda konhunto di solushonnan realista ku sosten amplio.
Kolegio Ehekutivo a enfatisá ku ta tuma e problema na lèntfel Lagun na serio i ku ta trahando duru na mehorashon konkreto. Mester di un kontribushon fuerte pa sigui traha den koperashon estrecho ku abitantenan, Selibon, tur otro stakeholder embolbí i gobièrnu di reino.
