Contrario na ministernan Geoffrey Wever y Gerlien Croes;
Dia 28 di maart den varios sentido tabata un dia scur pa Aruba. Ta e dia cu un bon gobierno, Gabinete Wever-Croes II a bai cas. Ta e dia cu e coalicion forsa di AVP y Futuro a huramenta, pero faltando dos minister. Ta e dia cu a rush pa trata e presupuesto di 2025, sin cu e parlamentarionan di AVP y Futuro por a prepara nan mes debidamente.Y awor ta bin resulta cu debi cu nan tabata mal prepara, nan a perhudica FCCA y e 3600 famianan cu ta wardando pa haya un cas.
Dicon nos ta bisa esey? Pasobra e siman aki FCCA tabata den Parlamento riba invitacion di presidente di Comision Financiero, sra. Shailiny Tromp-Lee (MEP), y nan a splica con urgente e ayudo di gobierno ta.
Nan ta referi na entre otro e ayudo cu Gabinete Wever-Croes II a inclui den presupuesto 2025.
• 17 miyon pa un fiansa na FCCA na un interes abou; cu e fiansa aki FCCA por a construi 100 pa 200 cas cada aña
• 2.7 miyon pa aumenta e huursubsidie cu gobierno ta paga na FCCA, pa asina FCCA por huur e casnan social na un suma mas abou yudando asina esnan cu no por paga un huur halto
Lamentablemente ministernan Geoffrey Wever y Gerlien Croes den e reunion di dia 28 di maart, a corta ambos suma, lagando nada pa FCCA. A pone e suma aki cu ta asina urgente, pa hinke den un fondo di inversion sin cu tin un proyecto cla pa esaki. Un cambio inexplicable. Mas lamentabel ta cu e parlamentarionan di AVP y Futuro, di cual mayoria no tabata ni 24 ora parlamentario, no a compronde kiko ta pasando, y a djis sigi ordo di nan partido pa aproba e cortamento.
Durante e reunion cu FCCA e siman aki e parlamentarionan ey a haya tur splicacion, y nan a realisa con nan ministernan Geoffrey Wever y Gerlien Croes a manipula nan. Pasobra mesora nan tambe a realisa e urgencia y necesidad pa gobierno yuda FCCA pa e miles di famianan por haya un dak riba nan cabes.
FCCA A INFORMA FORMADORNAN
Loke mas a hala atencion durante e reunion e siman aki, tabata cu FCCA a informa Parlamento cu nan a informa formadornan Mike Eman y Gerlien Croes di e situacion critico di FCCA y cuanto nan tin mester di e fondonan. Pues ta obvio cu tanto Mike Eman, Gerlien Croes como Geoffrey Wever, tabata di hopi mala fe dia 28 di maart, ora nan a manipula nan fraccionnan den parlamento, nenga di duna nan informacion, y asina a perhudica miles di famia wardando pa haya un cas.
Fraccion di MEP ta condena e acto aki di e gobierno nobo, y ta mas comprometi aun pa pone presion pa FCCA haya e fondonan necesario pa construi casnan social na Aruba