E trabou serio y den ekipo ta keda duna su fruta
Ex-Minister di Finansa, Xiomara Maduro, a expresa su satisfaccion y gratitud na e ekipo di profesionalnan Arubiano cu el a lidera, tras di e publicacion di e raport reciente di Fitch Ratings titula “Caribbean Credit Profiles Improve, but Structural Challenges Remain”. E raport aki ta mustra cu Aruba a logra mehora su posicion financiero den Caribe y ta manda un señal hopi positivo na inversionistanan.
Den e raport por lesa cu na maart 2025 Fitch Ratings a subi e rating di Aruba for di ‘BB+’ na ‘BBB-’ y a mantene un perspectiva positivo pa futuro. E upgrade ta refleha progreso den reduccion di e debe di Aruba, sosteni pa surplusnan fiscal halto e ultimo tres añanan y e implementacion exitoso di cambionan fiscal.
Fitch ta raporta cu Aruba a logra un surplus fiscal di 2.6% di GDP den 2024, y ta logra baha e debe for di 100.1% di GDP na 66.0% di GDP. E framework fiscal ta inclui meta di surplus di 1% di GDP, meta di reduccion di debe na 70% di GDP pa 2031 y 50% pa 2040, y un limite na gasto di personal na 10% di GDP.
A pesar di e mehoracion aki, Fitch ta indica cu Aruba ta enfrenta desafionan structural, cu ta inclui dependencia riba turismo y vulnerabilidad pa shock externo. Sinembargo, e raport ta mustra cu Aruba ta riba un rumbo positivo, y cu e esfuerso colectivo ta duna su resultado positivo pa Aruba. Maduro ta spera cu e evaluacion positivo aki lo sigui motiva e ministernan actual y e ekipo di profesionalnan Arubiano pa sigui traha riba un rumbo sostenibel pa e finansa publico di Aruba, y asina mantene e bienestar di pueblo como prioridad.