Durante e próksimo dos simannan, mas ku 90 sòldá Karibense lo trein huntu na Kòrsou durante e ehersisio Caribbean Strike. E ehersisio lo tuma lugá den e área rònt di Wacao, Ascension i Playa Santa Cruz.
Djamars dia 10 di yüni e militarnan di Aruba a subi e barku di sosten Zr.Ms. Pelikaan, ku a trese nan for di Aruba pa Kòrsou. Einan, huntu ku sòldánan di Kòrsou, nan lo entrená vários abilidat militar, entre otro infiltrashon táktiko di un área, patruya di rekonosementu, realisá atake i emboskada, vários ehersisio di tiru i aktua den áreanan urbano. E ehersisionan lo wòrdu realisá na vários lokalidat, entre otro e área di entrenamentu militar na Wacawa, den e área rondó di Ascención i rondó di Playa Santa Cruz. E unidatnan lo move entre e diferente áreanan di entrenamentu den vehíkulonan militar.
Profeshonalisashon
Caribbean Strike ta parti di e desaroyo profeshonal di e militarnan Karibense. Pa medio di entrenamentu intensivo den senarionan realístiko e preparashon pa para klá, i e posibilidat pa keda desplegá, ta ser hasi tantu den e unidatnan Arubiano komo esnan Kurasoleño. Ehersisionan manera esakinan ta esensial pa prepará e militarnan optimalmente pa nan tareanan den paisnan, inkluyendo dunamentu di asistensia den kaso di krísis òf kalamidatnan.
