Asociacion Trabou di Hubentud na Aruba (ATHA) a organisa cu exito e evento culinario i benefico “Tapas for a Cause”, un anochi special cu a combina sabor di tapas cu un causa di caridad: sosteniendo e desaroyo y empoderamento di hubentud den nos comunidad.
Den un ambiente caloroso y inspirador, esnan presente a disfruta di un seleccion varia di tapas prepara pa chef local ma Taste My Aruba Restaurant. E evento tabata yena di musica en vivo, presentacion di hoben talentoso ariba gitara y Mariachi Reyes Aruba cu a duna ambiente.
Tapas for a cause a realisa fondo destina pa proyectonan cu ta impacta e formacion di hubentud Arubano.
“Tapas for a Cause ta mas cu un fundraiser – e ta un movimento di comunidad, sabor culinario y speransa. ATHA ta sumamente agradecido cu e sosten cu nos a ricibi,” segun Franchesca Heinze, Director di ATHA.
E fondo recolecta lo yuda realisa proyectonan educativo, creativo y social, incluyendo actividadnan cu ta promove derechonan di mucha segun e Tratado Derecho di Mucha di Nacionnan Uni.
ATHA ta gradici tur boluntario, musiconan, chef, sponsor y invitado cu a contribui na e exito di e evento. Nos ta kere den e potencia di nos hubentud y ta sigui dedica na nan formacion.
Pa mas informacion di ATHA, por tuma contacto via info@athaaruba.com of sigui ATHA ariba facebook: ASOCIACION TRABOU DI HUBENTUD NA ARUBA – ATHA.
