Djaluna 30 di yüni 2025 a tuma lugá e di dos enkuentro di komunidat di vòlibòl, organisá pa INDEBON. Durante e nochi importante akí, a presentá ofisialmente e miembronan di e komishon nobo, ku e lunanan ku ta bini ta bai guia e proseso pa yega na un direktiva nobo i fuerte pa e deporte di vòlibòl na Boneiru.
E komishon nobo ta konsistí di seis miembro komprometí: Silvin Lomp, Ottmar Martie, Jenilee Schotborgh, Vaughan Astwood, Jehan Martis i Ildriana Cicilia. E variashon akí di konosementu i trayektoria, ta ofresé un base fuerte pa un aserkamentu transparente, inovadó i dirigí riba futuro.
E komishon tin e tarea, pa huntu ku e komunidat di vòlibòl, krea e kondishonnan nesesario pa elekshon hustu i lantamentu di un direktiva nobo ku ta bai sigui desaroyá e deporte. Esaki ta sosodé ku transparensia total i teniendo kuenta ku tur hende interesá den e deporte di vòlibòl na Boneiru.
INDEBON ta hasi un yamada na e komunidat di vòlibòl pa yuda e komishon asina huntu por konstruí na un struktura fuerte di vòlibòl pa awor i den futuro. Huntu nos ta pone e pasonan pa kresementu, desaroyo i konekshon duradero di e deporte di vòlibòl na Boneiru.