E conseho di turismo di Corsou (CTB) a anuncia ayera un crecemento di 14% den e luna di juli compara cu aña pasa. Un total di 67.000 turista a bishita nos hermana isla compara cu 2024. Paisnan di cual turistanan ta bin y cu a demostra mas crecemento ta; Sur-America cu a crece cu 46%, e mercado Norte-Americano tambe a crece cu 18%, mientras cu bishitantenan di e region di Caribe a demostra un crecemento di 11%.
Curaçao Tourist Board a subraya cu e mercado Europeo a mustra un caida minimal di 3%. Aunke e mercado Europeo a cay cu 3% toch esaki a keda como e mercado turistico di mas grandi y a trece mas di 27.500 turista den e luna di juli.
Top 3 paisnan di cual mas turista a yega Corsou den juli 2025. Hulanda : Corsou a ricibi 23.769 bishitante for di tera friu, esaki tabata un caida di 5%, compara cu e 24.976 turista di juli 2024. Hulandesnan ta keda na e isla un averahe di 14.1 anochi. Mayoria (61%) ta scoge pa hospedahe alternativo, mientras cu 39% si ta keda den hotelnan
Estados Unidos: Merca ta keda un mercado importante y esaki a ser demostra cu un crecemento di 20% compara cu juli 2024, caminda a ricibi 13.981 turista y esaki a subi na 16.735 bishitante. Mericanonan ta gusta keda den hotel y esaki a ser demostra cu 68%, mientras 32% ta keda den acomodacionnan alternativo. Nan ta keda un averahe di 5.9 anochi na nos isla.
Colombia: Turistanan Colombiano ta esunnan cu mas a crece den luna di juli cu 68% aumentando di 3.033 turista na aña 2024 pa 5.090 turista luna pasa. Nan ta keda hospeda un averahe di 5.3 anochi. Mayoria di Colombiano (55%) ta prefera keda den nos hotelnan compara cu acomodacion alternativo.