Despues di a kompletá un aña di entrenamentu ku éksito, djabièrnè último dieseis aspirante a risibí nan diploma di ‘Junior Bemanningslid Kustwacht’ (JBK) for di man di Walter Hansen, Direktor di Wardakosta di Karibe Hulandes i Alpha Falbru, Direktora di ‘Opleidingsinstituut Rechtshandhaving en Veiligheidszorg’ (ORV). E agentenan nobo a risibí nan diploma durante un seremonia na e Base Naval na Parera. E dieseis aspirantenan awor ta agente di Wardakosta kualifiká i pronto nan lo ser stashoná na e puntonan di sosten di Wardakosta na Sint Maarten, Aruba i Kòrsou.
Na ougùstùs 2024, binti hóben hòmber i muhé a kuminsá ku nan entrenamentu di ‘Junior Bemanningslid Kustwacht’ (JBK, anteriormente BOK). Durante e promé kuater simannan di nan entrenamentu, konosí komo e periodo di ‘Samen Sterk’ di Wardakosta, nan a wòrdu desafiá tantu mentalmente komo físikamente. Despues di e simannan di entrenamentu aki a kuminsá ku e sobra parti di e entrenamentu di JBK, kual ta inkluí lèsnan pa e parti polisial, kua ser sigui na ORV kual ta kubri e temanan manera, derecho penal i ‘strafvordering’. Despues nan a tuma lèsnan riba abilidatnan básiko i di tiramentu, nabegashon, materianan hurídiko, materianan náutiko i proseduranan di embarkashon. E agentenan nobo a surpasá hopi reto físiko, mental i teóriko i awor ta kla pa protehá e islanan.
Durante e seremonia na Base Naval di Parera, e Direktor di Wardakosta, Walter Hansen i Direktora di ORV, Alpha Falbru i e ‘Hoofd Initiële Opleiding’ di Wardakosta, señor Reinita a dirigí nan mes na e agentenan di Wardakosta nobo. Wardakosta ta un kuerpo polisial marítimo, esaki ta rekerí di e agentenan dòbel entrenamentu, un entrenamentu den e area marítimo i unu komo polis. E agentenan tin mas ku un aña ansioso pa e dia aki yega. Despues di a traha duru i ta leu for di kas pa periodonan largu, awor ta tempu pa nan selebrá. E diplomanan a ser otorgá i awor e trabou real na Wardakosta por kuminsa.
