Ya pa algun siman kaba Parlamento di Kòrsou no ta funshonando. Esaki no solamente ta un berguensa sino tambe e ta perhudikando nos pais malamente.
E lider polítiko di Partido Democraat, señora Elsa Rozendal ta kere firmemente ku kada parlamentario tin e obligashon di kuida e komunidat aki, kontrolá funshonamentu di gobièrnu i institutonan i salbaguardiá interes di nos pais na tur momentu.
Pa e motibu aki Partido Democraat ta hasi un apelashon riba parlamentarionan i partidonan ku tin asiento den parlamento pa no permití ku Gabinete Ruggenaath ta daña nos kara internashonalmente dor di pidi intervenshon di Hulanda pa e impase ku a surgi den Parlamento.
Si tin problema interno, mester asumí responsabilidat i atendé internamente.
E úniko konsekuensia di e akto aki ta ku e ta duna Hulanda rason ku Kòrsou su politíkonan i gobernantenan no por karga nan responsabilididat, ku nan no tin e madures polítiko i te asta esaki por pone nos demokrasia na peliger.
Mester evitá ku nos lo tin otro página pretu den nos historia kaminda fayonan hasí den seno di un Partido politiko ta redundá den paralisashon di Parlamentu i asina stroba gobernashon di nos pais. Partidonan polítiko, espesialmente esnan ku ta karga asignatura di un gobièrnu mester ta muchu mas diligente i responsabel ora ta trata asuntunan den nan seno ku por tin konsekuensia pa gobernashon. Kon un hende por manehá un pais si e no por manehá su mes Partido. Esaki ta un berguensa total.
