Durante su bishita na Hulanda, Prome Minister mr. Mike Eman, a haci un bishita formal cerca Minister David van Weel di Relacionnan Exterior, Asilo y Migracion. Minister van Weel a remarca cu Prome Minister Eman tin bon conocemento di Hulanda y a keda contento di por a cera conoci cu Prome Minister Eman.
Durante su encuentro, Van Weel a sigura cu Hulanda tin wowo riba e situacion na Venezuela y den region y tin e obligacion pa duna sosten cu defensa pa e islanan den Caribe Huandes si acaso e situacion escala pero te awo no tin motibo pa esaki. Apesar cu tin movecion di barconan Americano den e area pero esaki ta relaciona cu e operativo contra traficacion di droga for di Venezuela y nada mas, pues no tin un situacion agudo cu mester intervencion di defensa Hulandes.
Prome Minister Eman ta reafirma cu defensa Hulandes tin bista riba e region den Caribe pa tene e trankilidad den area. No tin motibo pa preocupacion, otro cu e operativo contra traficacion di droga for di Venezuela. Cu tin traficacion di droga for di e pais bisiña cu ta pasa den nos region, no ta nada nobo, y ta hustamente pa combati esaki, a trece Kustwacht Aruba y a instala radar rond di Aruba pa intercepta esaki. Tin un sentido grandi di trankilidad pa locual ta trata e atencion cu Reino Hulandes ta duna riba e tema aki.
Ta bon pa pone esaki den contexto pa locual ta e discusion riba e Rijkswet. Ta importante pa evalua kico ta e diferencianan di opinion y disputanan cu bo kier como pais, cu hustamente esnan cu ta duna e garantia di e trankilidad den e region y siguransa di proteccion basa riba e statuut cu nos tin. E interes pa trankilidad y den relacion constructivo y positivo cu ta habri porta economico y conocemente y portanan di estadistanan grandi manera ex-Prome Minister Balkenende cu ta mira e postura optimista y ta dispuesto pa yuda, ta pisa hopi mas cu weganan politico. No tin tempo pa weganan politico ora ta papia di siguridad y trankilidad den un pais. Esakinan ta temanan importante cu Aruba mester carga su responsabilidad, den e mundo grandi, cu conocemento, sabiduria, reflexion profundo y madurez.
