ACE Foundation huntu ku e artista di Kòrsou Alvin “Tio Ali” Inecia ta mira bèk riba un siman edukativo i inspirativo na Boneiru. Entre 10 pa 14 di novèmber, mas ku 800 mucha di skolnan i akohida a gosa di su presentashon interaktivo yen di músika, poema i kuenta. ACE Foundation huntu ku Tio Ali a duna aporte na siman di buki pa mucha 2025.
Aparte di e presentashonnan, Tio Ali a duna workshop na studiantenan di trahadó pedagógiko na Scholen Gemeenschap Bonaire, i tambe a hasi un seshon di teambuilding pa trahadónan di un akohida pa mucha. Reakshon di e muchanan tabata un gran impreshon pa Inecia. Muchanan di Kolegio Emmy Schermer ta esnan ku a hasi mas impreshon.
“Nan tabata fenomenal i nan a inspirá mi,” segun Inecia. “Maestronan a bisa ku e grupo por ta un reto , pero mi no a sinti esaki. Alkontrario, un studiante den ratu di ora, a skirbi un rima i mi a gui’é ku e parti musikal. Bunita pa eksperensiá.’’
E momentu kulminante tabata 13 di novèmber, ku e presentashon di e kuenta “Aventura ku Ritmo” na Creative World, un homenahe na Tio Ali. Riba e dia aki ACE Foundation a duna Tio Ali un rekonosementu den forma di un trofeo ku ta bisa “Danki Alvin `Tio Ali ` Inecia pa e bunita trabou di entretené pa eduka komunidat di Reino Hulandes. Boneiru 13 di novèmber 2025’’.
Segun Inecia, su teknika ta simpel:
“Kombiná entretenimiento ku edukashon. Ku plaser i ripitishon, mucha ta siña I keda kòrda. Esaki ta yuda nan desaroyo.”
ACE Foundation ta hopi kontentu ku e siman i spera pa risibí Tio Ali bèk riba Boneiru den futuro.
Press release: ACE Foundation
