Celebracion di Dia di Betico ta cerca. Dia 25 di januari ta marca e fecha natal di Libertador Gilberto “Betico” Croes, un dia nacional unda pueblo di Aruba ta honra y recorda su legado historico. Manera tur aña, Biblioteca Nacional ta organisa un actividad special, y e aña aki no ta un excepcion.
Biblioteca Nacional lo celebra Dia di Betico riba 22 di januari, cu un programa cultural amplio dedica na bida y obra di Betico Croes. E celebracion lo honra e Libertador cu diferente actividad cultural y artistico.
Glenda Zavala, encarga di organisa e evento, a informa cu uno di e momento central di e anochi lo ta e participacion di Guisette Croes, yiu di Betico Croes, cu lo comparti un relato riba e biografia y legado di su tata.
E programa tambe lo inclui declamacion di poesia door di varios Poeta di Patria, entre otro Rutty Vrieswijk, Ariana Chirino, Avi Goeloe y Berta Wolf, cu lo contribui na e ambiente solemne y cultural di e anochi.
Pa clausura e celebracion, e publico lo por disfruta di presentacion musical di Grupo Betico, un grupo funda door Betico Croes mes hopi aña pasa. Generacionnan di ruman, primo y subrinonan a keda sostene e grupo a traves di e aña, manteniendo bibo su espirito musical y legado cultural.
E actividad lo tuma luga dia 22 di januari, cuminsando pa 7:00 or di anochi, na Biblioteca Nacional. Biblioteca Nacional ta invita henter pueblo di Aruba pa participa den e celebracion di e dia special aki y honra un legado cu, “nunca nos mester lubida”.
