Ayera tardi den un reunion informal, representantenan di partido MPB a sinta na mesa huntu ku representantenan di partido demokrat riba invitashon di e lider di partido Demokrat. Den e reunion akí a fula tera pa wak e posibilidat pa lapi e gobièrnu eksistente bèk ku ayudo di MPB. “Di parti di partido MPB nos a bisa esnan presente ku nos no ta sinti nos mes yamá pa lapi e gobiernu bèk na otro. Nos a splika ku pa vários motibu ta difísil pa nos komo MPB na e momentonan akí hasi esaki,” segun e lider di MPB Hennyson Thielman.
Krítika pisá den komunidat
Thielman ta splika ku un di e motibunan akí ta e kantidat di krítika pisá ku pa tres aña kaba ta biba den nos komunidat tokante e forma di goberná di e koalishon aktual akí. “Hopi kos ta stanká akí na Boneiru i asta ora bo reklamá i mustra riba esakinan, nan ta tira falta riba gobernashon anterior, riba empleadonan públiko i riba tur otro hende. Pa koroná obra nan ta tuma bo na malu tambe. Esaki ta un di e motibunan ku Salma Serberie a disidí di kita su sosten for di e koalishon aktual,” segun Hennyson Thielman.
Nan a krea hopi problema na Boneiru
“Den e último 3 añanan MPB mes ta esun ku mas a krítika e forma kon e koalishon aktual a traha i krea hopi problema na Boneiru. Ainda ta fresku den nos memoria kon e diskushonnan fuerte a bai entre ami i e lider di Partido Demokrat Clark Abraham tokante kompra di tereno na Santa Clara, pa kua ainda tin un investigashon andando,” asina e lider di MPB Hennyson Thielman a trese dilanti.
Rumbo nobo pa Boneiru
Kontinuando Thielman ta bisa ku mas rápido posibel Boneiru mester di un otro rumbo den un direkshon positivo. “Di parti di MPB nos ta spera ku e otro partidonan i frakshonnan por yega na otro pronto pa forma un gobièrnu stabil pa por kuminsá atendé ku hopi di e problemanan ku ta biba den komunidat, entre otro e nesesidat urgente di kas pa hende biba, subida di preis, pèrmitnan ku ta pegá, kayanan ku ta den estado malísimo i sigur tambe e problema di lèntfel.”
MPB ta kla pa asumí responsabilidat
“Nos ta spera ku e partidonan i frakshonnan lo por basha awa den biña kaminda esaki ta nesesario, pa asina por pone bienestar di nos hendenan i nos isla na promé lugá. Partido MPB sigur ta kla pa mas rápido posibel asumí responsabilidat pa atendé ku e problemanan urgente ku nos isla tin na e momento aki formando parti di un koalishon nobo. Tanten ku no tin un koalishon nobo MPB ta habrí pa sostené proposishonnan serio ku tin prioridat na interes di Boneiru,” segun Hennyson Thielman.