Lider di fraccion di Movimiento Electoral di Pueblo (MEP), Evelyn Wever-Croes, a expresa su preocupacion riba e falta di reunionnan den Parlamento di Aruba. Segun e parlamentario, a haci diferente peticionnan pa reuni Parlamento pa debati temanan importante pa e pais, pero hasta awor e reunionnan aki no a wordo convoca.
Segun Wever-Croes, un di e peticionnan tabata pa trata e situacion economico actual, en particular e desaroyonan riba e mercado internacional di petroleo y e oportunidadnan cu por surgi pa Aruba. El a indica cu e tipo di tema aki ta merece discusion amplio den Parlamento.
E líder di fraccion di MEP a señala cu, segun su opinion, presidente di Parlamento Marlon Sneek no a convoca e reunionnan pidi. Segun Wever-Croes, e situacion aki ta pone en duda e funcion di Parlamento como institucion cu tin e tarea di eherce control riba gobierno y defende e interes di e pais.
“El ta mustra cu cas di pueblo no ta funcionando manera mester,” segun Wever-Croes, cu a enfatisa cu Parlamento mester tin e oportunidad pa debati y trata temanan di importancia nacional.
E discusion riba e funcionamento di Parlamento ta sigui forma parti di e debate politico actual den Aruba, caminda diferente partidonan ta expresa preocupacion riba e manera cu e institucion parlamentario ta operando.