Parlamentario Stephany Sevinger a participa den e reunion informativo den Parlamento di Aruba, unda sindicatonan uni a presenta nan punto di bista riba e proposicion di Rijkswet HOFA. Segun Sevinger, su presencia den e reunion tabata cu e meta di tende directamente di lidernan sindical, entre nan Jose Figaroa di FTA.
Sevinger a indica cu e intercambio di informacion cu sindicatonan a presenta a contribui pa un miho comprension di e rason nan tras di e proposicion di e ley. Segun Sevinger, durante e reunion sindicatonan a plantea pregunta nan fundamental na parlamentario nan, manera: dicon Aruba mester un HOFA, dicon e proceso a evoluciona pa un Rijkswet, y dicon e tema no a keda limita den un marco di LAFT.
Critica riba manera debate ta wordo conduci
Sinembargo, parlamentario Sevinger a expresa preocupacion riba e tono di e debate publico cu, segun Sevinger, ta tumando luga caba algun tempo. El a lamenta cu un partido politico, specificamente MEP, cu tabata parti di un gobierno anterior, segun su opinion ta utilisa sentimento di pueblo y patriotismo pa influencia opinion publico.
El a enfatisa cu esaki ta specialmente sensitivo despues di celebracionnan reciente di 18 di Maart, un fecha significativo pa Aruba, ora cu pais a conmemora 40 aña di Status Aparte y 50 aña di Himno y Bandera. Segun Sevinger, utilisa patriotismo den debate politico por resulta den su describi como “politica barata.”
Tema di confianza entre Aruba y Hulanda
Sevinger a plantea cu si mira e debate lo mira bek den pasado, e cuestion di confianza entre Hulanda y Aruba ta un factor importante. Segun Sevinger, e falta di confianza actual no a surgi di un momento pa otro, sino despues di un periodo prolonga di liderazgo politico cu, segun su evaluacion, a debilita e credibilidad financiero di pais.
E la indica cu actualmente Aruba ta dilanti un proceso pa implementa un Rijkswet, y no simplemente un LAFT, debido na decisionnan anterior cu, segun Sevinger, a crea tension cu Hulanda. E la referi na un momento den pasado unda, segun su interpretacion, un cambio den e acuerdo financiero LAFT a provoca reaccion negativo di parti Hulandes despues cu previamente a yega consenso.
Referencia na Bestuurlijk Akkoord di 2024
Parlamentario Sevinger tambe a menciona e Bestuurlijk Akkoord firma riba 4 di juni 2024, indicando cu e acuerdo a wordo presenta na Parlamento poco luna despues cu el a asumi su cargo como parlamentario. Segun Sevinger, e minister responsabel na e momento, ainda siendo demisionario, a presenta y plica Parlamento con e acuerdo ta relaciona cu e introduccion di e Rijkswet.
Sevinger a agrega cu, segun su informacion, ex prome minister Evelyn Wever-Croes mes a establece un grupo di experto pa elabora e propuesta di consenso riba e Rijkswet. El a señala cu e mesun persona cu a inicia e proceso posteriormente a expresa desacuerdo cu e resultado.
Gobierno actual mester continua cu acuerdo existente
Segun Sevinger, e gobierno actual di coalicion AVP–FUTURO tin obligacion di maneha e compromiso nan cu ya a wordo firma cu Hulanda. E la enfatisa cu e acuerdo tabata formalisa oficialmente cu firma di e autoridadnan corespondiente y cu anteriormente el a wordo presenta como un logro importante pa Aruba.
E la recorda cu durante e momento di firma di e acuerdo, ningun oposicion significativo no a wordo expresa publicamente. Segun Sevinger, situacion actual ta refleha diferente opinionnan, pero el a conclui cu gobierno nobo ta enfoca riba continua cu e HOFA y riba tende voz di pueblo den e proceso di decision.