Cornelis Wilson, un profesional Arubiano pensiona y planeado di desaroyo, ta boga pa un transformacion profundo den e forma di goberna na Aruba. Despues di a biba gran parti di su bida na Europa, Wilson ta comparti un vision particular unda e ta propone pa introduci un moralidad nobo den politica y gobernacion, inspira pa e figura universal di e mama y e concepto di cuido.
A traves di su iniciativa titula “Proyecto Mama”, Wilson kier hiba e debate politico mas aya di e ideologianan tradicional. “Nos tur a wordo cuida pa un mama,” Wilson ta enfatisa, aclarando cu su concepto no ta limita solamente na e mama biologico, sino na tur e personanan cu tin e miho interes y e labor di cuida nos pais na curason. Segun su perspectiva, e “salbacion” di Caribe ta den man di e balornan di mamanan.
Un “homber di mundo” cu curason na Aruba y Caribe
Maske el a nace na Aruba, Wilson a wordo manda Leiden, Hulanda, cu apenas 13 aña di edad. Door di a biba e mayor parti di su bida leu for di e sistema y e cotidianidad di e isla, el a desaroya un bista amplio cu ta yude considera su mes un “homber di mundo”. Wilson a toca e tema di su libertad personal, splicanan cu e distancia aki a dune e oportunidad di biba un bida “libera” for di cierto estandarnan local, un balor cu e ta aprecia masha hopi mes.
Actualmente, Wilson ta dedica gran parti di su tempo liber na su pasion pa poesia, skirbiendo den e cinco idiomanan oficial di Caribe: Papiamento, Ingles, Spaño, Hulandes y Frances.
Sinembargo, su conexion cu Aruba ta keda intacto. “Mi curason ta habri completamente pa Aruba, pa su pasado, presente y futuro,” e ta declara. E ta mira un similitud grandi entre e dinamica politico den e circulo chikito unda e ta activo na Leiden y e politica na Aruba, locual ta duna bida na su preocupacion pa e mesun problemanan y circunstancianan cu e pueblo ta pasa aden. Cu un toke di humor, Wilson a comenta cu, di un forma of otro, e ta haya “mas voto” (atencion y reconocimento) na Leiden cu na su propio tera natal.
Filosofia di “Proyecto Mama”: Cambio den e postura di poder
E meta central di e “Proyecto Mama” ta pa redefini e liderazgo. Wilson ta señala cu, maske aworaki mamanan ta ocupando posicionnan di mas importancia y poder den sociedad, hopi biaha nan ta adopta e postura y e stilo tradicional di goberna di e hende homber. Su meta ta pa fomenta un reconsideracion di e posicion aki, hinkando un perspectiva di amor, cuido y proteccion,caracteristicanan inherente na e figura materno den e gobernacion diario. E orador ta considera su mes un “yiu di tur mama,” manifestando su preocupacion pa e bienestar di tur hende muhe cu ta carga e titulo ey.
Propuestanan concreto: Museo y Muraya virtual
Pa duna substancia y bida na su filosofia, Cornelis Wilson ta bini cu dos propuesta palpabel pa Aruba:
- 1. Museo di Mama: Inspira pa e “Museo di Hende Muhe” cu Wilson tabata bishita tur luna ora e tabata biba na Hanoi, Vietnam, e ta propone un luga similar pa Aruba y corsou. E museo aki lo tin como proposito educa y crea conciencia riba e trayectoria y tur aspectonan di e bida di un mama, sirbiendo simultaneamente como un plataforma pa consolida e organisacionnan di hende muhe pa logra cambionan concreto den sociedad.
- 2. Muraya di Mama: E idea aki ta consisti di un muraya publico decora cu tegelnan di arte, portret, of diseño cu ta representa mamanan di e comunidad. Cada tegel lo conta cu un QR code cu ta dirigi e ciudadano na un website cu storianan detalla di e mama ey. Esaki lo permiti e pueblo mes conta su historia di un manera visible, sin depende structuralmente di corant of radio.
Sin miedo, sin berguensa, pero sin pasenshi
Wilson ta afirma categoricamente cu e no tin ningun miedo di purba influencia politica na Aruba, mirando e potencial enorme cu e isla tin pa sigui desaroya. El a priminti di uza tur tribuna y oportunidad publico cu e tin pa insisti riba e vision aki.
Pa locual ta su actitud personal den e bataya aki, Wilson ta habri su mes structuralmente: “Den mi moralidad, mi no tin miedo y mi no conoce berguensa,” el a finalisa, admitiendo si cu e único cos cu falta den su caminda ta pasenshi, ya cu e kier mira e cambionan social y politico aki sucede mas pronto posibel pa e bienestar di Aruba.