Mescos cu tur aña, e temporada di mas calor ta trece cune un bunita tradicion cu ya tin ocho aña ta tuma luga na nos isla: e celebracion di Shabeel Day. Maske hopi hende por pensa cu e tin di haber puramente cu e tempo seco y cayente, Shabeel Day tin un gran nificacion religioso y comunitario cu ta merece wordo comparti.
Kico ta Shabeel Day?
Shabeel Day ta un dia cu tin su origen den Sikhismo, un religion mescos cu Cristianismo, Islam of Hinduismo. Riba e dia specifico aki, e comunidad Sikh ta conmemora e sacrificio di un di nan gurunan (un profeta). Den pasado, e guru aki a wordo tortura debolbe den awa cayente, dunando su bida pa asina scapa bida di otro hende.
Pa honra e acto di amor y fieldad aki, e tradicion ta manda pa demostra generosidad na e prohimo. Con ta haci esaki? Door di parti refresco y awa friu pa un y tur riba caya, totalmente gratis, pa asina alivia e calor.
Un esfuerso familiar cu gran impacto
E bunita iniciativa aki na Aruba ta bini di un sola famia cu ta biba riba nos isla. Maske tin biaha nan ta ricibi un man di ayudo for di boluntario, e proyecto ta wordo carga fundamentalmente pa e nucleo familiar:
“E ta un ‘one-man show’ por bisa… nos ta un famia so. Mi casa, ami y mi yiunan,” e organisado ta conta.
E dedicacion aki ta uno grandi, ya cu e famia tin como meta tur aña pa parti un cantidad enorme di bebida. Nan ta bishita e puntonan di distribucion cu varios palet pa asina por parti mas cu 10,000 bebida friu pa yuda e pueblo di Aruba horta un momento di fresco den e dianan cayente aki.
Shabeel Day no ta simplemente un evento pa bati e calor, sino un bunita ehempel di fe, union y Comparticion structural cu nos comunidad.
