Ni maske cuanto palabra negativo bo scucha, keda cu bo Fe den Dios, keda confia riba Su poder, y pone tur cos den man di Dios, pasobra caminda e man di Dios ta milagernan ta sosode.
Tur esnan cu bisa, bo no por logra , zorg pa abo sigi confia den Senjor, pasobra pa Dios nada ta imposibel.
No depende riba hende, no adora hende, no sea esclavo di hende, para firme pasobra Dios no ta laga e husto desampara. Tin biaha bo tin hopi hende rond di bo, pero no ta tur kier yuda bo, no ta tur ta di confia, tin ta hunto cu bo pa wak kico bo ta haci y trata di sabotea bo planan, tin kier spiona pa wak di unda bo forsa ta bini.Tin kier haci cherche di bo ( Nehemias 2:19-20).
Pesey e palabra di Dios ta bisa: Confia den Senjor cu henter bo curason,y no depende riba bo mes comprendemento, Den tur bo camindanan reconoc’E y E lo dirigi bo berehanan.( Proverbionan 5-6).
Bendiciona ta e persona cu ta confia den Senjor y cu ta depende di Senjor pasobra den tur cos lo bo tin exito.
Nunca papia contra di bo mes, nunca no bisa mi no por, no sea cobarde, ni tampoco sea floho, corda cu e palabra di Dios ta bisa cu tur cos nos por den Cristo cu ta fortalese nos, y no lubida cu den Cristo nos ta mas cu vencedor.
Hesus a laga un palabra grandi pa tur esnan cu ta kere y kier logra algo den Senjor y tambe logra algo den nan bida bisando: Ami ta e mata di wijndruif boso ta e ramanan, esun cu keda den Mi, y Ami den dj’E , esey lo duna hopi fruta, pasobra separa di Mi boso no por haci nada.( Juan 15:5).
E mente di hende ta planea su camindanan, ma Senjor ta dirigi su pasonan. ( Proverbionan 16:9).
Orguyo ta pone hende cay den trampa di diabel, pasobra orguyo ta pone hende pensa cu nan no tin mester di Dios, y tin hasta ta publica e eror ey cu nan a logra cierto cos sin yudansa di Dios, pero nan ta lubida cu ta Dios ta duna rosea.
Diabel ta pone hende sabi y inteligente mustra bobo, ora nan pensa di tin un bida independiente for di Dios.
Wak con hende por susha propio cabes:
Nan ta biba den un curpa cu Dios a traha pero nan no kier pertenece na Dios. Dios ta duna rosea tur dia,pero te ainda nan no ta hanja necesario pa reconoce Dios como donjo absoluto di nan bida. Nan ta sabi den nan propio forsa, den nan orguyo y nan arogancia, y wak e caida cu ta den porta.
Hende cu ta biba den pica, inmoralidad, violencia, y falta di pordon, pero no kier entrega nan bida na Dios pa no perde amistad.
Ta mihor tuma refugio den Senjor cu confia den hende (Salmo 118:8). Hopi hende no ta realisa e previlegio cu nos tin, pasobra Senjor ta cu nos cu Su brasa fuerte pa defende nos.
Pesey Isaias 54:17 ta para scirbi:
Ningun arma cu lo wordo forma contra bo, lo prospera,y tur lenga cu lanta contra bo den husgamento lo bo condena. Esaki ta e herencia di e sirbidornan di Senjor,y nan hustificacion ta bini for di Mi.
Dios ta stima hende humilde pasobra hende humilde ta scucha di Dios, y nan ta obedece Dios, tur momento.
Si bo confia den Dios, lo bo mira Su poder den tur cos.
Sinceramente, Pastor Marcel Balootje.