Den un intervencion reciente den Parlamento, Lider di fraccion di PPA, Sr. Eduard Pieters, a trece dilanti su preocupacionnan tocante e proceduranan y e base legal cu ta wordo uza pa tuma decisionnan den e recinto.
Sr. Pieters a cuminsa su declaracion door di subraya cu su intervencion ta basa estrictamente riba loke su colega, Munzannine Wever a trece dilanti anteriormente. E parlamentario a enfoca su critica riba e aplicacion di e paragrapho 4, cual ta trata e “hoofdlijnen en werking van het fonds”.
Ausencia di un consensus Rijkswet
E punto principal di Sr. Pieters ta basa riba e falta di un consensus Rijkswet. Segun e parlamentario, pasobra no tin un consensus Rijkswet, no tin un base legal pa e decisionnan cu ta wordo tuma.
Pieters a dirigi na Presidente di Parlamento Marlon Sneek “Sr. Presidente, si nos no tin un consensus Rijkswet, bo no por papia di e voorgaande consensus Rijkswet,” El a enfatisa cu su punto di ordo ta gira rond di e echo cu si no tin un consensus Rijkswet, e ley no ta vigente. Sr. Pieters a conclui su intervencion bisando cu pa e motibo aki, e decisionnan cu ta wordo tuma, den su optica, no tin e base legal necesario.
Pero presidente di Parlamento a kita su derecho di expresa y papia y a cera e microfoon durante cu lider di fraccion di PPA tabata papia ainda.