Lider di fraccion di PPA felicita De Meza, pero ta cuestiona lealtad politico y proteccion legal di parlamentario
Parlamentario Eduard Pieters, lider di fraccion di PPA, a felicita publicamente su colega parlamentario Mike de Meza despues cu el sali liber di tur acusacion. Pero Pieters no a laga e momento pasa solamente como un felicitacion. El a transforma e desenlace den un mensahe politico directo: Ken realmente a para banda di Mike de Meza durante e momento mas dificil?
“Un pabien di curason pa Mike, pa su esposa, su mama y henter su famia. Despues di tanto incertidumbre, awe tin alivio,” Pieters a expresa. Pero segun e lider di fraccion di PPA, e caso mester bira tambe un momento di enseñansa pa politica Arubano.
Proposicion pa cambio den cuadro legal
Pieters a recorda, cu anteriormente Parlamento a trata un proposicion pa haci cambio di ley den e ley di LIM cu ta similar cu loke tin na Hulanda pa hopi aña caba caminda ta limita un politico wordo persigui zomaar y keda durante añanan bou di investigacion of acusacion, sin cu su situacion haya un desenlace. Segun Pieters, esey no ta encera cu ta trata di proteha e politiconan cu haci algo malo. Sino ta laga e investigacion riba e politico den man di e PG nombra pa bida den Reino, pa e por inicia e persecusion cu base fuerte. “Si un politico haci malo, e mester carga consecuencia. Pero tampoco nos por acepta cu cualkier acusacion, destrui un persona politicamente, mientras aña(nan) despues ta resulta cu e acusacion no tin base.”
Unda su propio partido tabata?
E parti mas politico di Pieters su mensahe tabata dirigi na e partido AVP. Segun Pieters, durante e periodo di incertidumbre, de Meza no a haya e sosten politico cu normalmente lo spera di liderazgo di su propio partido.
Pieters a cuestiona specialmente e posicion di lider di AVP y actual minister-president, sr. Mike Eman cu no a tuma decision ora e mester a haci esaki. El a permiti pa den Ministerraad continua e instruccion pa persigui de Meza. Ademas, ainda por corda cu na momento cu de Meza tabata na Corte, gobierno aki tabata ocupa cu actividad den Caya Grandi cu ta un caya pazuid di Corte, sin por a sikiera bin Corte pa duna nan sosten moral y politico na un colega. “Ora bo number dos riba lista ta den un momento dificil, liderazgo ta wordo midi si bo ta para banda di dje of si bo ta bira lomba.”
Segun Pieters, awor cu e caso a haya un desenlace favorabel pa de Meza, ta facil pa e politiconan acerca, felicita y celebra. Hipocrecia total y dobel moral politico a luci completamente den e partido. Paso unda nan tabata durante henter e periodo di incertidumbre? “Awe bo ta wak tur hende bin brasa y felicita. Pero politica no por funciona asina. Ora bo ta para pa algo, bo mester para firme tambe, ora e situacion ta dificil.”
Pieters ta cuestiona voto di coalicion
El a indica cu durante votacion di e cambio di ley di e LIM cu de Meza a propone, mayoria di coalicion AVP-FUTURO no a sostene e cambio proponi, mientras cu algun parlamentario individual si a adopta un posicion diferente. Dus, aki pueblo por mira cu hasta mayoria di su coleganan den su propio fraccion di AVP a laga Mike de Meza na caya. Pa Pieters, e desenlace actual ta obliga Parlamento pa reconsidera e discusion. “Awor pueblo por mira pakico de Meza y PPA a bay di acuerdo cu e cambio di ley. Netamente pa evita e situacion desagradabel aki” Segun Pieters, Estado di Derecho tin dos obligacion simultaneamente: investiga y castiga ora tin delito, pero tambe proteha ciudadano contra un proceso cu por prolonga indefinidamente y causa daño ireparabel na reputacion, famia y carera profesional.
Diferencia politico no mester elimina respet
A pesar di su critica fuerte na AVP, Pieters a dedica palabra di respet na colega de Meza. “ E respet cu de Meza y mi persona tin pa otro ta di ambos banda.” El a describi de Meza como un parlamentario cu experiencia y cu cual e por mantene e combersacionnan profesional. “Aunke awe nos por ta di diferente partido, ainda nos por siña di otro.” Ademas Pieters a confirma tambe cu e ta ripara cu sostenedornan di Mike de Meza kier pa e bay bek PPA y Pieters ta bisa cu esaki ta un decision personal di de Meza. “Tin varios otro politico di otro partidonan existente cu kier subi riba lista di PPA, esey ta un decision personal y nos ta respeta e proceso.” Pieters a bisa cu e ta combersa cu parlamentario di diferente fraccion tocante mocion, amienda y iniciativa cu por fortalece Parlamento y beneficia Aruba.
Pa Pieters esey mester ta e esencia di politica: interes nacional prome cu interes partidario.
“Mike, you did it”
Pieters a finalisa su mensahe cu un felicitacion personal, pero tambe cu un advertencia pa mundo politico. “Mike, you did it. Pabien y exito.”
Pero e mensahe tras di e felicitacion tabata hopi mas grandi. Pa Pieters, politica Arubano mester siña diferencia entre culpabilidad y acusacion, entre lealtad y conveniencia, y entre para banda di un colega ora e ta fuerte y para banda di dje ora e futuro politico ta den duda.
Pasobra, segun e lider di fraccion di PPA, ta precisamente den e momentonan dificil ey, pueblo por mira ken realmente ta un lider.