Varios Cita cu Fiscal a tuma lugar den ultimo lunanan aki, den cual Ministerio Publico a impone transaccionnan di te 15.000 florin pa traficacion di hende y trabao ilegal.
E transaccionan a wordo imponi contra companianan y personanan individual. E sospechonan tabata relaciona cu traficacion di hende. O sea, cu yuda personanan drenta Aruba ilegalmente y ofrece estadia na hendenan cu tabata kedando ilegalmente na Aruba. Sospechosonan a haya multa tambe pa pone personanan traha ilegalmente, esta: laga hende traha cu no tabata na Aruba legalmente.
E hechonan aki ta castigabel den articulonan 2:154 en 2:155 di Codigo Penal di Aruba.
Ministerio Pubico ta persigui hende pa e delitonan aki, pasobra nan ta causa daño na e maneho di gobierno pa loke ta e parti di combati estadia ilegal y trabao ilegal. E tipo di cosnan ey ta haci cu ta crea un circuito ilegal, cu ta hiba na hopi consecuencia indesea y ta swak fundeshi di comunidad. No solamente personanen stranhero ta keda perhudica, sino tambe e mes comunidad di yiu di tera.
Ta masha importante pa tur ciudadano, y dunadornan di trabao y huurdonan en particular, percura pa nan ta bon informa tocante ley y reglanan riba e tereno aki, prome cu nan pensa pa yuda un persona bin Aruba, pa huur nan estadia y pa tuma nan na trabao. Pasobra, aunke tin cierto situacionnan cu por wordo resolvi via un Cita cu Fiscal, ta bien posibel tambe cu un sospechoso ta wordo yama pa presenta dilanti Hues.