Cu e inicio di e aña parlamentario 2026-2027, Aruba ta drenta un etapa nobo di transformacion socio-economico. Sosteni pa e discurso di Gobernador, e aña aki ta priminti cambionan di gran impacto pa e pais. Dilanti e panorama aki, Parlamentario Carlos Bermudez di fraccion di AVP ta enfatisa cu Parlamento di Aruba mester mustra un nivel halto di maturides politico, caminda coalicion y gobierno ta traha hunto pa garantisa cu e ciudadanonan ta haya loke nan ta merece.
Crecemento Economico y Poder di Compra
Un di e pilarnan fundamental pa e periodo aki ta pa e crecemento economico di e pais wordo refleha directamente den saco di e pueblo.:
Eliminacion di costo pa remedi: E fondo cu antes e ciudadano tabata dedica na e gasto aki awor ta keda bek den su bolsillo.
Reparatietoeslag: Medidanan cu ta fortalece e poder di compra di e famianan.
Mitigacion di costo di combustibel: Ante e fluctuacion di e prijs di petroleo riba e mercado internacional, e decision di Gobierno pa absorbe 50% di e subida di combustibel a sirbi pa proteha e consumidor local.
A pesar di e esfuersonan aki, e parlamentario ta subraya cu e presion pa sigui baha e costo di bida ta permanece como un prioridad continuo.
Prioridadnan pa e Periodo Parlamentario 2026-2027
Pa e aña parlamentario nobo aki, e trabou legislativo y di supervision lo keda enfoca riba areanan clave pa e desaroyo di e sociedad:
Infrastructura: Mehoracion di e red di caminda (asfalt), considera no como un luho, sino como un necesidad basico pa e calidad di bida.
Cuido di Grandinan y Inclusion: Cristalisacion di proyectonan y leynan social, incluyendo mehoracion pa e cuido di nos ancianonan y e handicap uitkering, cu ta den caminda pa Parlamento.
Como e organo di mas halto di e pais, Carlos Bermudez ta remarca cu Parlamento tin e responsabilidad di actua cu seriedad y duna e ehemplo. Mas aya di e colornan politico, e 21 parlamentarionan ta representante di e mesun pueblo. E compromiso pa e aña aki ta pa laga discusionnan steriel atras, ehecuta e trabou di control riba Gobierno di manera firme y madura uzando e instrumentonan debi manera oranan di pregunta y reunionnan publico y traha uni pa e bienestar general di Aruba.