Pueblo di Aruba:
Awe mi ta comparti cu boso un di e momentonan mas dificil di mi bida.
Mi a wordo condena na dos aña di prison. Mi ta respeta e decision di e corte, pero mi no por acept’e.
Un cos ta un decision legal y otro cos hopi diferente ta, cu e decision ta uno husto y corecto.
Y awe mi kier papia cu boso di husticia. Pero tambe di dignidad, di igualdad y di e derecho di Aruba pa dicidi riba su propio futuro.
Durante e ultimo añanan nos a mira con varios politico di Aruba a wordo investiga y condena pa corupcion.
Pero mi kier haci un pregunta:
Cuanto Prome Minister of Minister di Gobierno Nacional di Hulanda a wordo condena pa corupcion durante e ultimo binti, trinta, cuarenta of cincuenta añanan?
Mi no a haya ni un solo condena….ni un! Esaki ta nifica cu na Hulanda no tin corupcion? Cu durante decadanan ningun minister a comete un iregularidad?
Cu corupcion solamente ta existi riba e islanan Caribeño?
Mi no ta acusa ningun hende sin prueba. Pero tampoco mi lo laga di haci e preguntanan tocante e diferencianan entre nos sistemanan di husticia.
Pasobra tin un frase cu awe ta bira mas fuerte cu nunca: “Mester haci loke nan ta haci y no loke nan ta bisa nos pa haci.”
Na Hulanda, pa por huzga un minister pa cierto delito cometi durante e ehecucion di su cargo, mester tin un decision di Gobierno of Parlamento.
Asina ta stipula den nan mes Constitucion!
Pero aki, na Aruba, a bisa nos, cu nos tin un procedimento diferente.
Nos huesnan ta nombra mediante decreto real. Nos sistema hudicial ta forma parti di un structura comparti dentro di e Reino. Y nos sentencianan por yega te na Tribunal Supremo di Hulanda.
Pues mi pregunta ta: Pakico nan tin un procedimento constitucional special y anos no?
Pakico tin garantia diferente pa un minister, cu ta forma parti di e mesun Reino?
Y pakico nos no por discuti e diferencianan ey, sin cu inmediatamente ta cuestiona nos compromiso cu husticia?
Mi no ta pidi impunidad, pero si mi ta exigi igualdad.
Mi no ta bisa cu un politico mester ta riba e ley. Pero si mi ta bisa, cu ningun ciudadano mester ta bou di e ley.
Pasobra no por tin ciudadano di prome categoria y ciudadano di segundo categoria.
No por tin pais di prome categoria y pais di segundo categoria.
Husticia no por tin dos categoria di ciudadano dentro di un mesun Reino!
Y p’esey mi ta ripiti: “Mester haci loke nan ta haci y no loke nan ta bisa nos pa haci.”
Si garantia constitucional ta importante pa e ministernan di Hulanda, nos tambe tin derecho pa exigi garantia efectivo pa e ministernan y e ciudadanonan di Aruba.
Y mi ke laga un cos absolutamente cla.
Mi no ta contra Hulanda.
Mi no ta contra e pueblo Hulandes.
Mi no ta contra nos historia comparti.
Mi ta reconoce tur loke nos a construi hunto. Mi ta reconoce loke Hulanda a aporta na Aruba.
Pero tambe mi ta exigi, pa Hulanda reconoce loke Aruba a aporta!
Nos trabou. Nos cultura. Nos economia. Nos identidad.
Aruba no ta simplemente un pais cu ta ricibi. Aruba tambe ta aporta!
Y p’esey semper mi a defende e necesidad pa fortalece nos autonomia.
Pasobra autonomia no ta solamente pa tin un bandera, un himno, un Parlamento of un Gobierno.
E berdadero autonomia ta consisti den tin e poder, pa dicidi riba nos propio futuro.
Nos no por papia di igualdad, si e decisionnan fundamental cu ta afecta nos pueblo ta tuma sin nos participacion efectivo.
Nos no por papia di autonomia si nos no tin pleno capacidad pa dicidi riba nos mes asuntonan.
Y nos no por papia di respet mutuo, si nos preocupacionnan no ta haya oido.
Mi no kier pa Aruba ta riba Hulanda.
Pero tampoco mi ta acepta cu ta consider Aruba menos cu Hulanda.
Esey tabata mi conviccion durante decadanan. Y e conviccion ey no ta cambia pa causa di un sentencia hudicial.
Awe nan a condena mi pa actuacionnan relaciona cu mi actonan como minister. Pa e decisionnan cu mi a tuma, buscando oportunidad di vivienda, trabou y desaroyo pa nos propio hendenan.
E tribunalnan a interpreta cierto actuacion di mi gestion como delito.
Mi ta respeta e decision, pero mi no ta compartie.
Mi a dedica mi bida publico na sirbi nos pueblo. Na conoce nan necesidadnan. Na busca solucion pa esnan cu tabatin mester un vivienda, un trabou of un oportunidad.
No pasobra mi tabata corupto.
No pasobra mi a horta.
No pasobra mi a beneficia mi mes.
No pasobra mi a trafica.
Y mi ta considera cu tin argumento y elemento di mi defensa cu mester ta examina di nobo.
Mi no ta aki pa pidi un privilegio.
Mi ta aki pa defende mi derecho na husticia. Pasobra un condena por kita mi libertad. Pero e no por kita mi derecho pa defende mi mes.
E por limita mi participacion politico.
Pero e no por elimina e decadanan cu mi a dedica na sirbi mi pais Aruba.
Nan por condena mi, pero nan no por obliga mi pa renuncia mi conviccionnan. Mi lo apela e sentencia aki. Mi lo continua mi defensa via tur e medionan legal cu ta coresponde.
Y mi lo enfrenta e proceso aki cu mi frenta na laira, cu dignidad y cu fe den Dios.
Mi no sa cua lo ta e decision final di e tribunalnan.
Pero mi sa sigur cu mi lo sigui defende mi derechonan y e principionan den cua mi semper a kere.
Pasobra respeta ley, no ta nifica renuncia na e derecho pa cuestion’e.
Pasobra defende nos autonomia, no ta nifica ta contra Hulanda.
Y pasobra exigi igualdad, no ta nifica pidi privilegio.
Nos no kier ta riba ningun hende.
Pero tampoco mi ta acepta cu nos ta considera menos cu ningun hende.
Aruba merece respet.
Aruba merece igualdad.
Y Aruba merece tin bos den e decisionnan cu ta afecta su futuro.
Esey tabata mi conviccion…Esey ta mi conviccion ainda.
Y ningun sentencia no lo cambi’e.
Cu Dios bendiciona nos pueblo!
Cu Dios bendiciona nos famianan!
Y cu Dios bendiciona Aruba semper!🇦🇼