Alumnonan na Boneiro por cuminsa prepara atrobe pa un edicion nobo di Fiesta di Salú. E aña aki atrobe, tur alumno di scol basico na Boneiro ta bay gosa di e evento cu ta promove importancia di salú na un manera divertido y accesibel. E aña aki GGD Bonaire / Salubridad Publico, organisado di Fiesta di Salú, ta pone atencion especial na educacion. Muchanan no ta descubri solamente con come saludabel y movimiento ta contribui na nan bienestar, sino ta siña tambe mas tocante con cuminda ta crece y di unda productonan saludabel ta bini.
Diputado Silberie tambe tabata presente na e apertura oficial di Fiesta di Salú di e aña aki. E diputado hunto cu e alumnonan a participa na e inicio festivo di e evento y a enfatisa e importancia di atencion pa un estilo di bida saludabel for di un edad chikito.
Aña pasa a organisa Fiesta di Salú pa prome biaha na scolnan di Boneiro. E concepto y e weganan conoci cu e superheroenan Zula Pampuna, Bita Banana, Wòti Walnoot y Awasito ta bek e aña aki tambe. E ekipe di Bon Salú ta yuda e muchanan pa, na un manera divertido y reconocibel, descubri opcionnan saludabel. Na mes momento e evento ta haña algun elemento nobo, cu ta haci e dia atrobe un experiencia yena cu sorpresa pa e muchanan cu a participa aña pasa caba.
Un parti especial di e edicion aki ta atencion pa pampuna, conecta cu e superheroe Zula Pampuna. Muchanan ta siña con pampuna ta crece, pakico e ta saludabel y ta ricibi un mata pa hiba cas pa aplica loke nan a siña. Asina ta conecta siñamento y haci cu otro. Tambe a agrega un stacion di kues nobo caminda e alumnonan por amplia nan conocemento tocante salú na un manera divertido. Ademas, na e stacion di awa infusiona ta dedica atencion extra na e beneficionan di bebe awa. Aki alumnonan ta descubri con awa cu fruta no solamente por ta saludabel, sino tambe sorprendentemente dushi.
E clausura festivo di Fiesta di Salú ta tuma luga dia 1 di november durante Cyclovia. Pa esaki ta invita henter e comunidad boneriano pa experientia e actividadnan di Fiesta di Salú.
