Diahuebs ultimo, e Centro di Operacionnan Maritimo (MOC) di Wardacosta a ricibi un yamada di un persona cu a mira un señal di ‘flare’ (fuerwerk cora) riba lama den besindario di Sta. Cruz. A base di e yamada aki, MOC a dirigi e avion di Wardacosta pa e localidad di e ‘flare’ pa por evalua e situacion.
Na yegada na e area, e tripulacion di e avion a mira un boto cu un homber abordo ta zwaya pa yudansa. Despues cu e boto aki a keda detecta, MOC a manda un Metal Shark na e sitio pa duna asistencia. E Metal Shark a tou e boto cu e homber local na bordo hiba safe den direccion di e bahia di Sta. Cruz.
Den e situacion di emergencia aki, e ‘flare’ na bordo a resulta esencial. E homber a sa di uza esaki pa hala atencion di personanan na tera pa laga sa cu e tabata den un situacion di emergencia. Den un situacion di emergencia, un ‘flare’ por ta un di e equiponan mas importante pa hala atencion di hende of otro botonan den besindario ora cu otro medionan di comunicacion no ta disponibel na e momento ey na bordo.
Wardacosta ta conseha tur doño di boto pa mantene nan boto regularmente. Soru pa bo tin suficiente equipo di seguridad y rescate na bordo manera: salbabida, ‘flare’, flashlight, kit di prome asistencia, suficiente awa, aparato di paga candela, radio VHF y un telefon celular carga. Evita cu bo boto ta daña na caminda y cu bo tin un situacion peligroso riba lama cu bo boto y bo pasaheronan. Den caso cu bo mester di yudansa, bo por tuma contacto cu Wardacosta riba canal VHF 16, yama e number di emergencia 913, of manda un mensahe via WhatsApp na 005999 510 0913. Wardacosta ta desea bo un biahe plasentero y sigur.