Land Aruba ta reconoce den un procedimiento civil cu e Ministeriële Beschikking original no ta menciona e parcela cu finalmente a ser entrega den erfpacht. Sin embargo, Land ta sostene cu esaki no ta afecta validez di e overeenkomst, entre otro pasobra e empresa ya a pasa door di un optieprocedure pa un tereno cu casi e mesun bestemming y un contexto espacial comparabel. Expertonan consulta ta adverti cu e interpretacion aki por crea un loophole serio den control di gronduitgifte.
Oranjestad, Aruba – 24 di oktober 2026
E proceso di entrega di tereno publico na Aruba ta nuevamente bou di lupa despues di un posicion presenta pa Land Aruba den un procedimiento civil, mientras cu Gervais R. Herdé ta actual Minister di Infrastructura, Energia y Telecomunicacion.
E controversia ta relaciona cu un optieprocedure cu originalmente tabata conecta na un tereno cu, despues di medicion catastral, a keda registra cu un superficie di 1.329 m². Finalmente, sin embargo, un otro parcela di aproximadamente 2.150 m² a termina relaciona cu un overeenkomst di erfpacht.
E diferencia ta 821 m², esta aproximadamente 61,8% mas grandi.
Pero e pregunta principal no ta e cantidad di metro cuadra.
E pregunta ta: cua proceso Gobierno a sigui pa pasa di tereno A pa tereno B?
LAND MES TA RECONOCE CU E MB ORIGINAL NO TA MENCIONA E PARCELA FINAL
Den e procedimiento civil, Land Aruba a reconoce expresamente cu e Ministeriële Beschikking original no ta contene referencia na e numero catastral di e parcela cu finalmente a ser entrega.
Land a declara:
“Het Land erkent dat MB DIP/865-A geen verwijzing naar het kadastrale nummer 1-K-4631 bevat.”
Pero Land ta agrega:
“Dit doet evenwel niet af aan de rechtsgeldigheid van de overeenkomst.”
Segun e posicion presenta na Corte, e empresa ya a pasa door di e optieprocedure pa un tereno cu tabatin “nagenoeg dezelfde bestemming” y “een vergelijkbare ruimtelijke context”.
Land ta argumenta ademas cu articulo 25a di Landsverordening Uitgifte Eigendommen (LUE) ta duna minister bevoegdheid pa otorga un opcion, pero cu, segun interpretacion di Land, e articulo no ta establece un obligacion absoluto pa otorga un opcion separa prome cu cada erfpachtverlening.
E argumento aki ta lanta un pregunta cu ta bay mucho mas leu cu e disputa entre dos empresa:
Si un optieprocedure pa tereno A por termina den entrega di tereno B pasobra e bestemming y contexto espacial ta similar, cua ta e limite di e discrecion ministerial?
“ONGEVEER 1.872 M²” NO TA NIFICA “CUALKIER OTRO TERENO”
Ora e opcion original a ser otorga na 2019, e Ministeriële Beschikking a describi e tereno como “ongeveer 1.872 m²”.
E palabra “ongeveer” ta importante.
Na e momento di otorgamento di e opcion, Land no a compromete su mes cu exactamente 1.872 m². E superficie menciona tabata aproximativo.
Despues di medicion oficial, e tereno relaciona cu e opcion a keda registra den Kadaster como un parcela di 1.329 m².
Esey ta e superficie catastral cu posteriormente a bira publico.
Un diferencia entre un superficie aproximativo y e superficie exacto despues di medicion no ta extraño riba su mes. Pero e punto juridico ta otro.
Midi e mesun tereno y determina su superficie exacto no ta mescos cu reemplasa e tereno cu un otro parcela.
E palabra “ongeveer” por explica pakico e medicion final no ta exactamente 1.872 m². Pero e no ta automaticamente un autorizacion pa pasa pa un otro numero catastral, un otro localidad of un parcela significativamente mas grandi.
Medicion ta determina e tamaño exacto di e tereno cu ta bou di opcion. Cambio di parcela ta cambia e objeto di e decision.
DI 1.329 M² PA APROXIMADAMENTE 2.150 M²
Despues di medicion, e parcela relaciona cu e opcion original a keda registra na 1.329 m².
Sin embargo, e erfpachtovereenkomst finalmente a ser relaciona cu un otro parcela di aproximadamente 2.150 m².
E diferencia ta 821 m², aproximadamente 61,8% mas grandi.
Land mes ta reconoce cu e MB original no ta menciona e numero catastral di e parcela finalmente entrega.
P’esey e pregunta central ta:
Cua decision formal a permiti cu un optieprocedure relaciona cu un parcela di 1.329 m² termina den un erfpacht pa un otro parcela di aproximadamente 2.150 m²?
EXPERTONAN: E OPCION TA RELACIONA CU UN PARCELA DETERMINA
Expertonan den materia di gronduitgifte consulta tocante e asunto ta sostene cu precisamente p’esey LUE y e optieprocedure ta importante.
Segun nan interpretacion, un opcion ta relaciona cu un tereno determina, un proyecto determina y condicionnan determina.
E Ministeriële Beschikking, e situatietekening y e condicionnan ta permiti identifica e objeto di e opcion y controla cumplimiento di e procedimiento.
E propio informacion oficial di DIP ta describi e optierecht como e derecho di prome escogencia pa celebra un erfpachtovereenkomst cu Land tocante un “bepaald perceel voor een bepaald project onder bepaalde voorwaarden.”
Esta: un parcela determina, pa un proyecto determina, bou di condicionnan determina.
Segun e expertonan consulta, si por cualkier motibo Gobierno considera necesario cambia e parcela durante e procedimiento, e cambio mester wordo formalisa mediante un decision ministerial adecuado y e condicionnan relevante mester wordo controla pa e parcela nobo.
E interpretacion aki ta di e expertonan consulta. Finalmente ta juez den e procedimiento civil actual cu mester evalua e argumentonan juridico presenta pa ambos banda.
Pero e pregunta di interes publico ta cla:
Si e parcela a cambia, unda ta e decision formal cu a autorisa e cambio?
AVESTRUZ: HOF A DESCRIBI UN PROCESO, NO SOLAMENTE UN FIRMA MINISTERIAL
E discusion actual ta particularmente relevante despues di e sentencia di Gemeenschappelijk Hof van Justitie den caso Avestruz.
E procedimiento civil actual no ta Avestruz, y e sentencia Avestruz no ta prueba cu den e controversia actual un delito a ser cometi.
Pero e similitud importante ta e proceso di gronduitgifte y e uso di autoridad ministerial dentro di e proceso ey.
Den Avestruz, Hof a dedica atencion extenso na e cadena administrativo cu ta precede entrega di tereno comercial: solicitud, evaluacion administrativo di DIP, decision ministerial, opcion, pago di derecho di opcion, cumplimiento di condicionnan y eventualmente erfpacht.
E solicitud mester identifica, entre otro, descripcion di e proyecto, tipo di proyecto, cantidad di tereno necesario, ubicacion desea, inversion proyecta, forma di financiamiento y eventual schetsnan.
Despues di e solicitud, DIP ta ehecuta evaluacion y control administrativo. Si e solicitud ta viable, un Ministeriële Beschikking di opcion por sigui.
E proceso no ta termina simplemente cu un “akkoord” di minister. Despues di otorgamento di opcion, e opcionhouder mester cumpli cu condicionnan adicional prome cu e proceso por sigui pa erfpacht.
E importancia di Avestruz ta precisamente aki:
Discrecion ministerial no ta elimina e importancia di e proceso administrativo.
SI E TERENO CAMBIA, KICO TA PASA CU E CONTROL?
E optieprocedure ta sirbi pa Gobierno por controla un proyecto prome cu entrega patrimonio publico.
Durante e periodo di opcion, documentonan manera bouwtekeningen, haalbaarheidsstudie, informacion di inversion y prueba di financiamiento por forma parti di e control.
P’esey, si e parcela cambia, e pregunta ta inevitable:
E evaluacion di tereno A automaticamente ta suficiente pa tereno B?
Un bouwtekening pa un parcela no ta automaticamente un bouwtekening pa un otro parcela.
Un evaluacion di un proyecto riba 1.329 m² no ta automaticamente e mesun evaluacion riba 2.150 m².
Un ubicacion diferente por tin otro condicionnan tecnico, infrastructural y espacial.
P’esey “mesun bestemming” no ta necesariamente contesta e pregunta si mesun proceso di control a ser cumpli.
BOUWAANVRAAG: UN EJEMPLO CONCRETO DI PAKICO E PROCESO TA IMPORTA
Un punto concreto den e controversia actual ta e bouwaanvraag.
Segun informacion obteni di DOW pa e parte reclamante, no tabatin un bouwaanvraag registra pa e parcela finalmente entrega prome cu e erfpachtovereenkomst a ser firma na banda di Pais Aruba.
E condicionnan di opcion original menciona bouwtekeningen detaya y prueba di entrega di un solicitud di bouwvergunning.
Esey ta lanta un pregunta directo:
Si e optieprocedure a ser sigui pa e tereno original, cua bouwplan a ser controla pa e parcela finalmente entrega?
Y si no tabatin un bouwaanvraag specifico pa e parcela final na e momento relevante:
Con Gobierno a determina exactamente kiko lo wordo construi riba e tereno cu e tabata entrega den erfpacht?
E pregunta aki ta toca e esencia di e optieprocedure: control prome cu entrega.
E PAGO DI OPCION TA DEMONSTRA CU SUPERFICIE Y PARCELA TA IMPORTA
E Ministeriële Beschikking original ta demonstra cu superficie di e tereno tin consecuencia financiero.
E opcion original a menciona aproximadamente 1.872 m², cu un grondwaarde di Afl. 95 pa m².
Riba e base ey, e calculacion ta:
1.872 m² × Afl. 95 = Afl. 177.840.
Tres procent anual ta Afl. 5.335,20.
Pa un opcion di seis luna esaki ta Afl. 2.667,60, rondona na Afl. 2.668.
E calculacion ta demonstra cu e derecho di opcion ta conecta directamente cu superficie y balor di e tereno identifica den e decision.
Despues di medicion, e parcela relaciona cu e opcion a keda registra na 1.329 m². Finalmente, un otro parcela di aproximadamente 2.150 m² a ser relaciona cu e erfpacht.
P’esey Gobierno mester por demonstra con e aspecto financiero a ser trata.
Tabatin un calculacion nobo? Tabatin verrekening? Tabatin un pago adicional? Y si no, riba cua fundamento legal?
BEKENDMAKING DI 2 MEI 2024: 20 DIA PA OBJECTA, PERO RIBA CUA INFORMACION?
Un otro elemento importante ta e bekendmaking oficial di 2 mei 2024.
E publicacion tabata anuncia intencion di Land pa entrega e parcela di aproximadamente 2.150 m² na un solo gegadigde.
E bekendmaking tabata precisamente e informacion cu otro ciudadano y empresario mester usa pa determina si nan tabatin motibo pa objecta.
Land a duna tercero 20 dia calendario pa inicia un procedimiento di kort geding si nan no tabata di acuerdo cu e seleccion.
P’esey exactitud di e informacion publica tabata esencial.
Den e bekendmaking, Land a menciona e Ministeriële Beschikking di 11 di maart 2019 mediante cual un derecho di opcion a ser otorga.
Land a declara tambe cu, conforme e opcion, e documentonan requeri a ser entrega na DIP, evalua y aproba.
Mas importante ainda, e bekendmaking ta declara cu desde 2019 Land tabata den negociacion cu e empresa concerni tocante e voorgenomen uitgifte den erfpacht di e parcela cu e publicacion identifica como e parcela di aproximadamente 2.150 m².
Pero awo tin un contradiccion cu merece explicacion.
Den e procedimiento civil actual, Land Aruba mes ta reconoce cu e Ministeriële Beschikking di 2019 no ta contene referencia na e numero catastral di e parcela di 2.150 m² cu finalmente a ser entrega.
E opcion original tabata relaciona cu un otro tereno, cu despues di medicion a keda registra na 1.329 m².
P’esey e pregunta ta:
Cua impresion un ciudadano razonabel a haya ora e lesa e bekendmaking di 2 mei 2024?
E publicacion a pone den un mesun cadena di motivacion e opcion di 2019, cumplimiento di e optievoorwaarden, negociacionnan desde 2019 y finalmente e intencion pa entrega e parcela di 2.150 m² na un unico gegadigde.
Pero si e MB di 2019 no tabata pa e parcela finalmente entrega, Gobierno mester splica cua documento formal a conecta e opcion original cu e otro parcela.
DIDAM: E FUNDAMENTO PUBLICA MESTER POR WORDO CONTROLA
E bekendmaking mes ta presenta e circunstancianan menciona como “objectieve, toetsbare en redelijk te achten gronden” pa selecciona un solo gegadigde.
E palabra “toetsbare” ta crucial.
Si Gobierno ta usa un opcion, cumplimiento di optievoorwaarden y negociacionnan historico como fundamento pa exclui otro potencial gegadigden, e hechonan ey mester por wordo controla contra e expediente oficial.
Segun e analisis documental presenta den e disputa, tin diferente punto cu ainda ta exigi aclaracion: e MB original no ta identifica e parcela finalmente entrega; no a ser presenta e documento primario cu demonstra cumplimiento di tur optievoorwaarden specificamente pa e parcela final; segun informacion obteni di DOW no a ser encontra un bouwaanvraag specifico pa e parcela final prome cu e erfpacht; y no a ser identifica documentacion parcela-specifico cu ta demonstra negociacionnan desde 2019 tocante precisamente e parcela finalmente entrega.
Sin e documentonan aki, ta dificil controla e fundamento factual cu a ser presenta na publico como razon pa selecciona solamente un gegadigde.
CIUDADANONAN TABATIN 20 DIA PA DECIDI SI NAN LO BAY CORTE
E bekendmaking tabatin consecuencia juridico practico.
Ciudadanonan y otro empresario cu eventualmente tabatin interes den e tereno tabatin 20 dia calendario pa evalua e informacion publica y decidi si nan lo inicia un kort geding contra Gobierno.
Un ciudadano cu lesa cu Gobierno tabata negociando desde 2019, cu tabatin un opcion y cu tur documentonan requeri a ser entrega, evalua y aproba, por razonablemente conclui cu e posicion di e gegadigde selecciona tabata ampliamente documenta.
Pero awo Land mes ta reconoce cu e MB original no ta menciona e parcela finalmente entrega.
Esey ta lanta e pregunta:
Si e informacion publica no tabata suficientemente parcela-specifico, con un tercero por a evalua correctamente si e tabatin fundamento pa objecta?
Un bekendmaking Didam no ta simplemente un anuncio.
E ta un instrumento mediante cual tercero mester por evalua si nan derecho of interes ta wordo afecta y si nan mester acudi na Corte.
Si ciudadano ta haya 20 dia pa controla Gobierno, Gobierno mester duna ciudadano informacion correcto, verificabel y suficientemente completo pa por haci e control.
POSIBEL VALSHEID IN GESCHRIFTE TA FORMA PARTI DI E KEHO PENAL
E parte reclamante considera e discrepancianan den e documentacion suficientemente serio pa solicita investigacion penal.
E pregunta si e bekendmaking of otro documento por constitui valsheid in geschrifte no ta algo cu un articulo di noticia por determina. Pa establece un delito asina mester analiza e contenido, intencion, conocimiento di e personanan involucra y tur requisito penal aplicabel.
Pero tin un pregunta factual cu merece respuesta:
Gobierno tabata sa, ora e bekendmaking a ser publica, cu e Ministeriële Beschikking di 2019 no tabata identifica e parcela cu e publicacion tabata anuncia pa entrega?
Y si Gobierno tabata sa esaki:
Pakico e diferencia entre e dos parcela no a ser explica claramente na publico, especialmente ora tercero tabatin solamente 20 dia pa objecta?
KEHONAN PENAL OFICIAL ENTREGA NA MINISTERIO PUBLICO
E preocupacionnan tocante e proceso di gronduitgifte no a keda solamente den correspondencia administrativo ni den e procedimiento civil.
Kehonan penal oficial a ser entrega na Ministerio Publico di Aruba, cu peticion pa investiga si den tratamiento di e expediente por tabatin actuacion cu tin relevancia penal.
Den e kehonan, Ministerio Publico a ser solicita pa investiga, entre otro, posible falsificacion of uso di documentonan engañoso, posible ocultamento of eliminacion di evidencia, posible abuso di funcion publico, obstaculizacion di e buskeda di berdad, posible oplichting of bedrog y eventual favorecimento indebido.
E kehonan solicita tambe investigacion di e papel di funcionarionan y otro personanan involucra den tratamiento di e expediente, besluitvorming, procedimiento di DIP y entrega di erfpacht.
Ademas, Ministerio Publico a ser solicita pa asegura y preserva documentonan y datonan relevante, incluyendo expedientenan di DIP, documentonan relaciona cu ambos parcela, decisionnan ministerial, conceptbes